Шредер ја обвини Грузија за борбите
Не верувам дека Русија води политика на анексија и дека ќе има враќање на претходниот статус во Јужна Осетија и Абхазија
Поранешниот германски канцелар Герхард Шредер ја обвини Грузија за поттикнување на непријателства со Москва и навести дека нејзините отцепени региони не можат да останат дел од Грузија по жестоките борби што се водеа минатата недела. Во интервјуто за германскиот неделник „Шпигел“, Шредер, исто така, го критикуваше Запад за неуспесите во неговите постапки со Русија и ја повика Европа да ги зајакне своите врски со Москва. Шредер разви блиски односи со поранешниот руски претседател Владимир Путин за време на седумгодишниот мандат како канцелар, а сега е претседател на германско-рускиот конзорциум кој го гради големиот цевковод за транспорт на гас под Балтичко Море. „Не верувам дека Русија води политика на анексија и исто така не верувам дека ќе има враќање на претходниот статус кво за Јужна Осетија и Абхазија“, изјави Шредер, осврнувајќи се на сепаратистичките грузиски региони. „Тоа не доаѓа предвид“.
И двата региона се меѓународно признати како дел од Грузија, но тие и се лојални на Москва, а нивните лидери долго време се обидуваат да добијат независност од Тбилиси. Ставот на Шредер изгледа не е во согласност со оној на германската канцеларка Ангела Меркел и на САД каде и двете страни посочија дека регионите мора да останат дел од Грузија.
Берлин, Вашингтон, Лондон и домаќинот на поранешните советски сателити во централна Европа го осудија како диспропорционален воениот одговор на Русија во конфликтот. „Почетната точка на воената конфронтација беше влезот на грузиските војници во Јужна Осетија. Не треба да ги мешаме работите“, изјави Шредер, на прашањето кој е одговорен за почетокот на насилствата меѓу руските и грузиските сили. Тој се сомнева дека САД, силниот сојузник на Грузија, не бил информиран за почетната грузиска офанзива со оглед на фактот дека има воени советници стационирани во Тбилиси.
„Според мое мислење, бевме сведоци на големи грешки од страна на Запад во неговата политика спрема Русија“, изјави Шредер. Тој апелираше до ЕУ да продолжат со плановите за потпишување на „стратешко партнерство“ со Москва, посочувајќи дека Европа ризикува да го загуби влијанието и да ја сврти Русија кон Кина, ако не соработува со Кремљ. (Ројтерс)
|
