До пред две години Прачанда илегално дејствуваше како милитантен лидер
КАТМАНДУ - Членовите на парламентот од Непал со големо мнозинство во избраа лидерот на маоистите Прачанда за нов премиер на државата. Прачанда (53) освои 80 отсто од гласовите и го порази единствениот негов ривал кандидатот на Конгресната партија Шер Бахадур Деуба. Маоистите освоија неочекувана победа на изборите во април а уште две други клучни партии ја дадоа својата поддршка за Прачанда. Минатиот месец во Непал беше инаугуриран претседателот Рам Баран Јадав чија што функција главно е церемонијална откако монархијата во мај беше урната. Ова се случува само две години откако Прачанда излезе од повеќе од дведецениското илегално дејствување како милитантен комунистички лидер.
„Јас сум многу среќен и многу емотивен“, рече тој откако го напушти конститутивното собрание по гласањето, објави новинската агенција АФП. Она што Маоистите го нарекуваа нивна „народна војна“ остави зад себе 13.000 жртви, десетици илјадници раселени и голем дел од инфраструктурата на државата во урнатини. Дописникот на Би-Би-Си во Катманду јави дека сега поранешниот герилец ќе биде најмоќниот политичар во оваа хималајска држава откако 464 законодавци му ја дадоа поддршката, а само 113 беа против.
Заменик лидерот на маоистите Бабурам Батараи изјави: „Денес е ден на гордост и ќе биде испишан со златни букви во историјата на нашата држава“. Тој претходно предвиде дека Прачанда ќе биде лидер „за новата ера“ споредувајќио го со Ленин или Наполеон. Гласањето што се одржа во петокот и стави крај на неколкумесечната политичка криза што уследи по соборувањето на непопуларниот крал Гјанендра и аболиција на 240-годишнатга монархија. (Би-Би-Си)
