Претставата „Граница“ ќе се игра во претседателски апартман
Во рамките на „Скопско лето“, вечерва ќе се одржат два настани. Во Куршумли ан во 20,30 часот, ансамблот на народни песни и игри „Орце Николов“ од Скопје, ќе одржи концерт насловен „Ехото на обичаите“. Овој ансамбл е формиран во 1945 година, со цел да ги негува и прикажува обичаите, народните игри, песните, музиката, инструментите и носиите на Македонија.
Во претседателскиот апартман во хотелот „Континентал“, пак, во 21 часот, ќе биде изведена претставата „Граница“ на Венко Андоновски, во режија на Софија Ристевска. Ова е уште една од претставите на Малиот драмски театар од Битола, која се игра на алтернативен, невообичаен простор. Во „Граница“, во која фокусот е ставен на прашањето: до каде може да оди пенетрацијата на тоталитаризмот во нашите домови, улогите ги толкуваат: Горан Стојановски, Јасмина Билаловиќ, Никола Тодоровски, Јоана Поповска и Борис Чоревски. |
