Прва и трета награда за хорот „Св. Злата Мегленска“ во Калифорнија
Женскиот хор „Св. Злата Мегленска“, под диригентско водство на Летка Димовска-Полизова, освои две значајни награди на второто издание на Меѓународниот хорски фестивал во Сент Луис, САД. Хорот „Злата Мегленска“, во силна конкуренција, од која на крајот останале само хорови од САД, Саудиска Арабија, Конго, Филипини и од Македонија, ги освоил првото место, во категоријата слободен избор на хорот, како и третото место во категоријата фолклор. Фестивалот траел од 25 до 29 јуни, а македонскиот хор во САД престојувал 20 дена, со тоа што одржал концерти и во Њу Џерси и Лос Анџелес. Гостувањето е остварено со поддршка од Министерството за култура на Македонија.
„Овие награди ќе имаат посебно место не само за историјата на нашиот хор, туку воопшто за Македонија“, вели диригентката Летка Димовска-Полизова. Таа, на вчерашната прес-конференција, истакна дека хорот ја претставил Македонија на најдобар можен начин и дека присутната многубројна публика на натпреварот ги поздравила со овации. „Св. Злата Мегленска“ извел дела исклучиво од македонски автори, овој пат хорски творби од Тодор Скаловски, Запро Запров, Драган Шуплевски и Александар Лековски. „Нашиот хор досега настапувал на 17 меѓународни фестивали, но овој пат наидовме на навистина врвна организација. Овој фестивал ќе го паметиме по топлиот прием. Целиот град всушност, живее токму за овој фестивал“, вели Полизова.
Куриозитет на фестивалот бил самиот хор-домаќин, кој токму затоа што е домаќин не влегол во конкуренција за награда. Но, како што истакна Полизова, хорот подготвил по една песна за сите учесници на нивниот мајчин јазик, па во чест на македонскиот хор ја испеал детската песна „Татковина“ од „Златно славејче“, во сосема нов и интересен аранжман. (Т.И.) |
