Насловна

ВМРО-ДПМНЕ ги доби трите мандати во дијаспората

Од гласањето за пратеник од американскиот континент

Тамара Грнчароска


Владејачката ВМРО-ДПМНЕ ги освои сите три пратенички места од дијаспората, победувајќи во Австралија, Европа и во Америка и Канада. Новите пратеници на ВМРО-ДПМНЕ се Милорад Додевски-Мики, Павле Саздов и Ристо Манчев. Она што неофицијално можеше да се дознае за првите народни избраници во македонското Собрание од дијаспората е дека и тројцата се од помладата генерација македонски иселеници.

Додевски има 33 години и е од скопската населба Аеродром, а во Австралија заминал пред четиринаесет години. Тој по професија е банкар и, што е најкуриозитетно, денот кога беше избран за пратеник стана и младоженец.

Додевски од ВМРО-ДПМНЕ освоил 542 гласа од вкупно пријавените 773 гласачи во Деветата изборна единица, додека кандидатот на СДСМ, Неда Ѓореска, освоила 18, а трет е Ицо Најдовски со 13 гласа, додека Трајче Гулевски од Обединети за Македонија - 12. Најдовски вчера за „Утрински весник“ изјави дека во Австралија не гласале 150 пријавени избирачи, бидејќи, иако уредно се пријавиле, ги немало во избирачките списоци. Меѓу „непостојните“ била и поранешната секретарка на конзулатот во Мелбурн. За текот и начинот на гласањето Најдовски вели дека македонската заедница во Австралија била скандализирана од тоа како се' се одвивало. „Во Австралија ја донесоа Африка, вакви избори не сме доживеале. Петстотини луѓе не можеа да изгласаат за 12 часа, а што ако бевме 5.000“, вели Најдовски. Тој тврди дека гласањето во Австралија било наместено, со целосна мобилизација и агитирање на гласачите за ВМРО-ДПМНЕ со помош на амбасадата во Канбера и црковните општини на владиката Петар, кои организирано со автобуси ги превезувале гласачите. „И во црквите се пополнуваа формуларите за гласање по инструкции на амбасадата и конзулатот“, вели Најдовски.

Најдовски тврди дека не му било дозволено да поднесе жалба до ДИК за нерегуларностите што ги забележале тој и неговите координатори на денот на гласањето во Мелбурн. Исто така, дека Додевски мобилизирал и агитирал пред самата зграда на конзулатот кога пристигале автобусите со гласачите и постојано влегувал и излегувал од зградата додека се гласало, што не е дозволено. „Сметаме дека е нерегуларно гласањето и, со недозволувањето на 150 гласачи да го дадат својот глас, тие се селектирани“, вели Најдовски.

Неофицијално од наши иселеници од Австралија се дознава дека меѓу кандидатите во Австралија немало вистинска кампања и дека таа, особено меѓу кандидатите на ВМРО-ДПМНЕ и СДСМ, се свела на закани и навреди. Сметаат дека иако идејата за гласање на дијаспората е одлична, за една мала земја каква што е Македонија, реално, трошоците за тоа се огромни. Само за организирање на гласањето во Канбера и во Мелбурн од Македонија допатувале 10 луѓе, а пред две недели таму престојувал и мобилниот тим од МНР за издавање пасоши на нашите иселеници за потребите на гласањето.

Павле Саздов, пак, кој ќе ги претставува интересите на нашите иселеници во Америка и во Канада, е роден во1983 година во Скопје, а во Канада заминал на средношколска возраст. Но, откако во 2005 година дипломирал на информатички науки во Канада, завршил специјалистички студии на ФОН во Скопје, каде што моментално има запишано и магистратура. Од 2005 година работи како бизнис-консултант по информатички технологии за „Бест бај Канада“. Тој, како што наведува самиот во својата кратка биографија, по покана на премиерот Никола Груевски во 2010 година се вратил во земјава како државен секретар во Министерството за информатичко општество и администрација. Во интервјуто за Обединетата македонска дијаспора, Саздов, одговарајќи на неколку прашања, за спорот за името вели: „Мојот став е идентичен со ставот на ВМРО-ДПМНЕ“. Според него, не смее по никоја цена да има виткање на „кичмата“ и „нашиот принципиелен став за проблемот за името се виде изминативе години и тоа е константа што ќе продолжи“. На барањето да наведе една своја програма за македонските иселеници и како ќе ја спроведе, повторно се повикува на ВМРО-ДПМНЕ: „Во мојата програма, односно во програмата на ВМРО-ДПМНЕ, има многу проекти и мерки кои директно се однесуваат на Македонците од САД и од Канада“. Според неофицијални информации, Саздов освоил 73 проценти од гласовите, Драги Стојковски од Достоинство - 12 проценти, а Душан Синадиновски од СДСМ - девет.

Ристо Манчев, кој на ВМРО-ДПМНЕ и' ја „освои“ Европа, е струмичанец роден во 1969 година. Тој шест години живее во Пјаченца, Италија, а по професија е градежен инженер. Манчев е најголемото изненадување на изборите во дијаспората, бидејќи се очекуваше во Европа гласот да го добие кандидат-Албанец. Медиуми на дијаспората објавија дека и во Европа гласачите биле носени до избирачките места со автобуси, но дали биле носени само тие на ВМРО-ДПМНЕ и кој ги платил трошоците вчера не се знаеше.