Насловна

Ѓорчев: Груевски останува премиер

По тишината што завладеа во штабот на ВМРО-ДПМНЕ откако беа затворени гласачките места во 19 часот и шпекулациите дека раководството се крие бидејќи не е задоволно од резултатот, синоќа во 22,45 часот досегашната владејачка партија објави уште една победа. Победата можеше да се насети уште со најавата дека првата и воедно единствена прес-конференција што ја одржа Влатко Ѓорчев, чие пристигнување беше проследено со стотина вмровски члена и симпатизери што го исполнија прес-центарот во очигледна победничка еуфорија. „Македонските граѓани не треба да се грижат. Татковината останува во сигурни раце, Никола Груевски повторно ќе биде премиер“, рече Влатко Ѓорчев, проследен со скандирања: „Победа“, „Цело Скопје е вмровски град“... ВМРО-ДПМНЕ ја прогласи, како што рекоа, прославата на победата на платото пред Домот на Армијата на РМ, а притоа беше најавено доаѓањето на премиерот и партиски лидер, Никола Груевски, заедно со своите најблиски соработници. Првите реакции на новинарите беа дека иако ВМРО-ДПМНЕ сака да објави голема победа, таа не е толку голема во споредба со претходните избори, но дека, сепак, тоа е четврта едноподруго победа на ВМРО-ДПМНЕ над социјалдемократите. По што Македонија влегува во политичка неизвесност со оглед на ставовите на Груевски кон најгорливите политички прашања и со оглед на тоа што СДСМ овој пат влегува во парламентот засилена со нови 12 пратеници за разлика од досега, односно вкупно 40-ина пратеници. (С.К.)