Претходен број

Коментар

Чудниот црно-бел свет на Данците

Наум Котевски

Тамам кога помисливме дека шокантните изјави на данските ракометарки за „Македонија земјата на питачи“ се нивна моментална емоционална скршеност по посетата на т.н. пластичарска улица во Скопје и погледот на „луѓето кои живеат во картонски кутии“, а која, за жал, се пласираше во тамошните медиуми како општа слика за државава, завчера следуваше уште еден шок.

Во Редакцијата на „Утрински весник“ стигна писмо од Македонката Татјана Пановска-Нилсен, која живее во Данска. Таа во него категорично вели вака: „Синоќа на данската телевизија коментаторите што ги пренесуваат натпреварите од Европското првенство во ракомет кажаа дека нивната репрезентација играла со бели дресови затоа што во Македонија повеќето луѓе имаат црно-бели телевизори, па целта била на сите да им се овозможи да ги разликуваат ракометарките“. Згрозена од овие коментари, Татјана се обидела сето ова да го демантира и пратила и- мејл до весниците и електронските медиуми во Данска.

Колку што можеме да разбереме дека коментарите на данските ракометарки за „црната Македонија“ се резултат на нивната недоволна информираност, избрзаност, па можеби и погрешна медиумска интерпретација, уште повеќе не може да го сфатиме, колку и да се трудиме, „црно - белиот минимализам“ на данските коментатори, кои, свесно, или не, и' фрлија „варикина“ на бојата. Од причина што тоа се луѓето што треба да бидат вакцинирани од какви било стереотипи и предрасуди, кои во суштина спречуваат на вистински начин да се искомуницира со другиот и реално да се запознае неговата земја. Данските коментатори непрофесионално се одлучија да функционираат на веројатно најлесниот начин - следи ја палетата на стереотипи и непроверените приказни и нема да губиш време за професионален подлабок осознаен ангажман. Ќе си гледаш ракомет и крај!

За целата оваа искривена слика за Македонија има голема вина и кај организаторот. Во таа насока, по којзнае кој пат, деновиве мора да ја потенцираме до бесвест експлоатираната реална констатација дека мораше организаторот да се потруди да им ја покаже Македонија на европските гости во малку поинаков амбиент. Да им каже дека за одредени делови од градов и државава не ни може да се каже дека се во застој, затоа што никогаш немало ни динамика, но дека тоа не е ни оддалеку глобалната реалност. Сепак, тоа нема да не' спречи да им кажеме на данските новинари, кои се потрудија за „две минути исклучување“, да одат во Трговски колку што е можно побргу и да купат црно - бел телевизор. Ако им успее, ние ги честиме рисивер!