Фудбалски вести
Попов и Херенвен елиминирани од Брага
Македонскиот репрезентативец Горан Попов и неговиот Херенвен се елиминирани од групите од Купот на УЕФА, со поразот од Брага на свој терен од 1:2. Херенвен, иако, поведе со голот на Сибон од слободен удар во 19 минута, Португалците само 15 минути подоцна успеаја да израмнат со погодокот на Рентира. Во 56 минута победата на Брага и ја донесе Луис Агуиар.
Вториот наш интернационалец Златко Таневски, исто така настапи за Лех Познањ, на мечот со Ла Коруња. Шпанците водеа на овој натперевар со голот на Колото уште во втората минута, а Ренгифо израмни во 42 минута на 1:1, епилог кој го остава Лех во игра за пласман во шеснаесетфиналето. Последното коло во оваа група ќе донесе мала војна, каде три тима конкурираат за преостанатите две места (Нанси, Депортиво и Лех).
Во последното коло Лех, кој има два бода помалку од Ла Коруња, а три од Нанси, му гостува на отпишаниот Феенорд.
Инаку, по завчерашните натпревари од Купот на УЕФА познати се уште шест патници во шеснаесетфиналето. Астон Вила, Хамбургер, Ајакс, Волфсбург, Брага, Валенсија, а натпреварувањето го завршија пет тимови - Жилина, Розенборг, Славија Прага, Портсмут и, како што кажавме, Херенвен.
Резултати
Група Е: Волфсбург - Портсмут 3:2, Херенвен - Брага 1:2
Табела: Волфсбург 9 (3 меча), Милан 7 (3), Брага 6 (4), Портсмут 1 (3), Херенвен 0 (3).
Група Ф
Астон Вила - Жилина 1:2, Славија Прага - Хамбургер 0:2
Табела: Хамбургер 6 (3), Астон Вила 6 (3), Ајакс 6 (3), Жилина 4 (4), Славија 1 (3)
Група Г
Копенхаген - Розенборг 1:1, Валенсија - Бриж 1:1
Табела: Сент Етјен 7 (3), Валенсија 5 (3), Бриж 3 (3), Копенхаген 2 (3), Розенборг 2 (4)
Група Х
Лех Познањ - Депортиво 1:1, Нанси - ЦСКА М. 3:4
Табела: ЦСКА 12, Нанси 4 (3), Депортиво 4 (3), Лех 2 (3), Феенорд 0 (3)
И Леванте и Атлетик Билбао лажирале натпревар
Само неколку дена откако во Шпанија се рашири аферата дека Малага стигнала до Примера на нелегален начин, се појавија наводи дека и Леванте пред две години му препуштил на Атлетик Билбао победа, за Баскијците да останат во елитата. Бившиот капитен на Леванте Инјаки Дескарага изјави дека некои негови соиграчи го лажирале тој натпревар.
Родителите на Пуерта бараат 250.000 евра од Севилја
Родителите на несреќно починатиот фудбалер на Севилја Антонио Пуерта побараа од клубот 250.000 евра, како компензација за смртта на нивниот син. Како што е познато Пуерта почина од срцев удар на првенствениот меч против Гетафе на 25 авгсут 2007 година. „Пуерта живееше со своите родители и тој им даваше економска сигурност. Да не зборувам за моралната отштета, која во суштина е најбитна“, изјави адвокатот Мадит.
Едуардо се враќа со Виган?
Во денешниот натпревар со Виган на терен би можел да се врати напаѓачот на Арсенал, Едуардо, кој поради скршеницата на ногата подолго време го нема во фудбалот. Арсен Венгер најави дека планира да му даде барем пет минути на хрватскиот репрезентативец, што би значело дека неговата агонија ќе заврши по 286 дена. „Едуардо тренира напорно и добро. Треба да го вратиме на терен колку што е можно побргу“, кажа Венгер. |
