Студот стегна, а „Топлификација“ неподготвена

Поради проблеми вчера беа затворени 260 објекти,
а греење немаа над пет илјади граѓани

Снежана Калабакова


„Топлификација“ стартуваше со грејната сезона пред 15 октомври и пред да се исполни условот три дена едноподруго во 21 часот температурите да паднат под 12 Целзиусов степен. Но, како да беше нецелосно подготвена за предвремениот почеток. Дел од скопјани во продолжениот празничен викенд добија топли радијатори, меѓутоа огромен број граѓани измрзнаа во своите домови чекајќи да добијат парно.

И годинава грејната сезона старуваше со многубројни проблеми, затворени објекти, проблеми во мрежата и течење на инсталации, а парно немаат и оние што не си ја платиле потрошената струја во потстаницата. Без греење остана дел од жителите на Карпош, Аеродром, Кисела Вода, Центар. Според информациите од АД „Топлификација“, дефекти има во 260 објекти и како што велат, ако во секој од нив има во просек по 20 станари, тогаш најмалку 5.000 граѓани имаат студени домови.

За редовните плаќачи на сметките за парно неприфатливо е да мрзнат и денес кога ќе се вратат од работа, доволно измрзнале и минатиов тридневен викенд. Наместо празнично да одмораат дома со семејството, тие велат, или морале да бегаат и да одат на гости, или да направат дополнителен трошок трошејќи струја вклучувајќи греалки и климатизери. Многу граѓани што се јавиле на телефонскиот број за рекламации 3076-200 велат дека останале без адекватен одговор од „Топлификација“, бидејќи телефонската секретарка само ја снима нивната поплака, а од другата страна нема кој да им одговори за колку време ќе добијат греење и каде е дефектот. Граѓаните апелираат до претпријатието на граѓаните да им одговара жив човек, кој точно ќе им каже за каков дефект станува збор за да знаат што да планираат натаму. Револтот на корисниците на парно е безграничен, затоа што освен пари, студот во нивните домови ги чини и здравје. Сметаат дека претпријатието треба поподготвено да стартува со греење, па макар тоа да треба да го стори и еден месец порано од зацртаниот термин. Особено кога станува збор за дефекти во мрежата за кои се одговорни оттаму. Секое лето има раскопани канали и се менуваат цевки, но, очигледно, тоа не е доволно, бидејќи најголемиот дел од топлификациската мрежа е стар и поради тоа настануваат дефекти.

„Сите топлани работат нормално и скопјани веќе добија греење. Но, има околу 260 затворени објекти. Кои се објектите и зошто се затворени дадовме известување во дневниот весник ’Нова Македонија‘. Дел од нив се затворени поради течење на внатрешните инсталации, значи дефекти за кои ние не сме надлежни. За дефектите во внатрешните инсталации, одговорни се корисниците и тие се должни да ги отстранат навреме, пред да стартуваме со греење“, вели Алфонс Вета, одговорен за дистрибуција на топлинска енергија во АД „Топлификација“.

Од претпријатието тврдат дека четириесетина нивни вработени постојано се на терен и работат на отстранување дефекти, но признаваат дека тие не се доволно и не можат да постигнат секаде да интервенираат. За пријавување дефекти и рекламации имаат осум телефонски линии, кои постојано се отворени да ги снимаат пораките, што е, како што велат, единственото решение за да можат да ги примат сите. Идејата да се јавува жив човек за нив одамна е неприфатлива, бидејќи потрошувачите се жалеле дека телефонот постојано им е зафатен. Од друга страна, пак, револтирани граѓани си давале за право по десетина минути да се расправаат со телефонските оператори. Сега, со снимањето на пораките имаат ригорозна контрола, со што сите се земаат предвид.