Кавадарци - По осми пат годинава се одржа стопанско-културната манифестација „Тиквешки гроздобер“. Белег и годинава даде винскиот карневал што се одржа низ улиците во Кавадарци. Во карневалските поставки учествуваа ученици од сите основни и средни училишта во Кавадарци. И годинава беше претставена лозаро-винарската традиција на градот. Носител на активностите беше Домот на културата „Иван Мазов - Климе“, а организатор Општина Кавадарци. Лозарите за момент побегнаа од секојдневјето и проблемите со кои се соочуваат за време на бербата на грозјето, но не заборавија да искоментираат дека и годинава визбите се мајтапеле со откупните цени. Карневалот имаше меѓународен карактер со учество на гости од Србија, Словенија, Бугарија како и гости од земјава од Прилепскиот и Струмичкиот карневал. Карневалското дефиле го проследија неколку илјади гости, меѓу кои и заменици на министри и актуелни политичари. Во рамките на фестивалот, винарските визби од Кавадарци ги презентираа своите производи. (А.Д.)
