Македонските туристи избија на прво место во Албанија
Тирана - Во текот на оваа година македонските туристи првпат го зазедоа првото место по бројност на листата на странски туристи што ја посетиле Албанија. Во првите осум месеци од годинава, од вкупно 2,8 милиони туристи колку што влегле во Албанија, над 262.000 биле од Македонија. Веднаш зад нив се туристите од Косово, па оние од Црна Гора.
Досега приматот во Албанија го држеа туристите од Косово.
Зголемување бележи и бројот на туристите и од други европски земји, најмногу од Италија, Грција, Германија.
Според албанскиот министер за туризам Или Панго, 85 отсто од туристите во Албанија престојувале на летување и во семејни посети, а шест проценти поради бизнис. Шест отсто од туристите во земјата се задржале само еден ден. (МИА) |
