Американските власти презедоа контрола врз „Фани Меј“ и „Фреди Мак“
Вашингтон - Американските федерални власти завчера соопштија дека презеле контрола врз двете големи хипотекарни банки „Фани Меј“ и „Фреди Мак“, како дел од мерките за надминување на кризата со хипотекарните кредити, што ги потресува САД од минатата есен.
Американскиот министер за финансии Хенри Полсон информира дека по преземањето на контролата врз банките, сменети се нивните извршни директори. За нов директор на „Фани Меј“ е поставен поранешниот потпретседател на инвестициската банка „Мерил Линч“ Херб Алисон, додека за прв човек на „Фреди Мак“ е именуван некогашниот потпретседател на банката „Ју-Ес банкорп“ Дејвид Мофет. Полсон нагласи дека ваквата мерка е преземена бидејќи двете банки се „толку големи и толку инволвирани во американскиот финансиски систем“ што евентуален банкрот на некоја од нив би предизвикал хаос на финансиските пазари.
Министрите за финансии на групата седум индустриски најразвиени земји (Г-7) уште за вчера најавија телефонски консултации за ситуацијата, само еден ден по одлуката на американската влада да ја преземе контролата над работењето на водечките хипотекарни корпорации.
Веста за итните консултации на Г-7 ја објави во Токио јапонскиот министер за финансии Бумеи Ибуки, кој претходно предупреди дека пропаѓањето на корпорациите во САД може да влијае на светскиот финансиски пазар и уште повеќе да ја продлабочи тековната глобална кредитна криза.
„Фани Меј“ и „Фреди Мак“ опфаќаат околу 50 отсто од американскиот хипотекарен пазар во вредност од 12 милијарди долари. (Ек.Р.)
