Кој ќе печати, а кој вакумира книжни пари?

Кој ќе ги печати книжните 10 денари, домашна или странска фирма?

Вчера во Народна банка на Македонија беа отворени понудите за печатење на банкнотите во апоен од 10 денари. Се пријавиле две фирми: печатницата „11 Октомври“ од Прилеп, која и досега ги печатеше книжните 10 денари, и полската фирма „Витворија папиров“. Понудата на прилепската печатница е значително пониска и изнесува 384 илјади евра, а фирмата од Полска бара 455 илјади евра за нивно печатење. Главен услов што требаше да го исполнат фирмите е во последните три години да остварувале вкупен приход не помал од 30 милиони денари, или 500 илјади евра на годишно ниво во областа што е предмет на јавната набавка. Од НБМ ништо не сакаат да коментираат во врска со јавните набавки. Инаку, централната банка на друг оглас што трае до 3 ноември бара да купи и машина за вакумирање книжни пари.

Ова покажува дека се враќаат во игра само книжните десетденарки. Иако, речиси две години во оптек се и книжните и кованите 10 денари, сепак, се очекува��е дека во меѓувреме кованите ќе ги заменат книжните, но излегува дека книжните пари ги победија кованите. Од НБМ велат дека допрва ќе се прави анализа врз чија основа ќе решат дали во оптек ќе останат да функционираат и книжната и кованата десетденарка или само едната од нив. Кованите пари од 10 и од 50 денари НБМ реши да ги воведе пред две години, а и тогаш и сега граѓаните даваат отпор кон овие монети. (С.М.)