Кочани - Нови инвестиции од седум до осум милиони евра во „Саса“, најавува раководството на рудникот, кој е во сопственост на руската компанија „Солвеј индустрио“. Според менаџерите, оваа инвестиција во рудникот во Македонска Каменица треба да овозможи зголемување на бројот на сегашните 700 вработени. Од „Саса“ информираат дека планските предвидувања за годишно производство од 870 илјади тони ископана оловоцинкова руда, се остварени за неполни осум месеци од работењето.

Според Максим Прохоров, директор за инвестиции во „Саса“, иако економската криза се чувствува и во овој рудник, сепак, се остварува производство, оловоцинковиот концентрат редовно се пласира, а ископот на руда постојано се зголемува. „Во четвртиот квартал од 2008 година, со наглиот пад на цените на обоените метали, во рудникот се појавија проблеми со пласманот на концентратот, а беа стопирани и некои инвестициони програми. Но, и во такви услови бројот на вработените не беше намален, не беше скратена работната недела, ниту намалена платата на работниците“, вели Александар Крихтин, генерален директор на „Саса“.

Кон крајот на 2008 година раководството на „Саса“ доби дозвола за детаљни геолошки истражувања на нови рудни наоѓалишта, а според ангажираниот стручен тим, резервите на руда се мошне големи, со што се зголемуваат перспективите на рудникот. Досегашните геолошки истражувања покажале дека во ревирот Свиња Река под кота 1059 постои големо присуство руда за натамошна експлоатација. Веќе е изработена инвестициска програма, како и активности за дополнување на минерално суровинската база на рудникот, со цел да се одржат веќе постигнатите производни капацитети. (МИА)