Деведесетгодишен старец убиен во Кучевиште

Владимир Гурмешевиќ починал по пресметка со синот, кој е пренесен во болница

Горан Адамовски



Деветдесетгодишен жител на скопско Кучевиште е убиен во семејната куќа во селото. Старецот починал по пресметка со 66-годишниот син, кој со повреди на телото е пренесен во болница. Во исказот пред полицијата, синот потврдил дека се степал со татка си, но, наводно, не можел да се сети како се случило убиството. Полицијата изврши увид и работи на расчистување на случајот.

Инцидентот се случил во понеделникот наутро во куќата на Гурмешевиќ во Кучевиште. Откако соседите алармирале за крвава пресметка, полицијата излегла на терен и во ходникот од куќата го пронашла мртов Владимир Гурмешевиќ (90). Тој имал видливи повреди по главата и по телото.

„Во куќата бил пронајден и неговиот син Д.Г. (66), кој, исто така, бил облеан во крв и со видливи повреди по главата и телото“, соопшти полицијата.

Повредениот маж бил однесен во Ургентниот центар, а во разговор со полицијата посочил дека најпрво се скарал со татка си, а потоа бил физички нападнат од него.

„Потоа не можел да се сети што се случило“, велат од истрагата.

На самото место биле пронајдени сатар, нож и траги од крв. Телото на починатиот е предадено за обдукција.

Семејната куќа на Гурмешевиќ вчера беше празна. Во незаградениот двор беа расфрлани секакви предмети и машини. Во шталата останаа кокошките и магарето, кои немаше кој да ги нахрани и да ги напои.

„Синот, кој е разведен веќе три-четири децении, и таткото живееја сами во куќата. Ретко излегуваа, се занимаваа со земјоделство. Синот често знаеше да се напие, ама и тогаш не правеше проблеми. Никогаш не сме ги чуле и виделе да се караат, ама којзнае што правеле дома“, раскажуваат шокираните соседи.

Индициите дека синот го убил таткото - ќе ги проверува полициската истрага, која треба да ги утврди и причините за злосторството.