Потврдени две години затвор за возачот на Тоше

Ѓорги Ѓорѓиевски е осуден на две години затвор поради сообраќајката во Хрватска, во која загина Тоше Проески

Апелациониот суд во Скопје ја потврди затворската казна за Ѓорги Ѓорѓиевски, возачот на „туарегот“ во кој пред речиси три години загина музичка ѕвезда Тодор Проески. Одлуката на Основниот суд Скопје 1, кој го осуди возачот на две години затвор, како што дознаваме, била донесена на 9 јули, а во текот на вчерашниот ден е испратена до судот, кој ја донесе првостепената пресуда.

Скопскиот Кривичен суд на 21 октомври 2009 година ја донесе првостепената пресуда со која го осуди Ѓорги Ѓорѓиевски на затворска казна за кобната несреќа во која загина познатиот пејач. Трагедијата се случи на 16 октомври 2007 година кога во близина на Нова Градишка „турегот“ во кој се наоѓаа Проески, неговата менаџерка Лилјана Петровиќ и возачот Ѓорги Ѓорѓиевски, удри во камион со српски таблички. Судирот беше кобен. На самото место загина дваесет и шестгодишниот Тодор Проески, додека неговите двајца сопатници беа полесно повредени.

На јавната седница на Апелација, која се одржа пред неколку недели, по жалбата на одбраната и Јавното обвинителство за висината на казната, Ѓорѓиевски изрази жалење на несреќата и остави на судот да одлучи за неговата судбина.

„Жалам за она што се случи. Го изгубив најдобриот другар и пријател“, рече тогаш Ѓорѓиевски. Низ солзи тој пред судиите на Апелација кажа дека од неговиот најдобар другар му останала само една заедничка фотографија, која ја покажа во судницата.

Неговата адвокатка, Силвија Џилвиџиева, бараше или првостепената пресуда да биде укината или на обвинетиот да му се изрече алтернативна казна, бидејќи, според неа, направени се повреди во постапката.

Како аргументи на одбраната беше посочено дека брзината од 152 километра на час со која се движел „туарегот“ била паушално одредена, а како голем пропуст на целиот процес се наведуваше и непојавувањето на возачот на камионот, Славиша Кузмановиќ, кој судот не успеа да го обезбеди од Белград.

Бранителката правеше споредби со хрватскиот закон за сообраќај на патиштата, каде што во вакви случаи се изрекувале многу поблаги казни поради болката и повредите што му се нанесени и на обвинетиот. Одбраната на возачот тврдеше дека неговата агонија трае речиси три години и дека тој подолго време е на лекување на Психијатриската клиника во Скопје.

Јавниот обвинител, пак, тврдеше дека пресудата не смее да биде укината, бидејќи во иднина тоа ќе претставува репер на кој ќе се повикуваат странки во некои идни вакви случаи. (Д.Т.)