Нафтата не престанува да тече

БАТОН РУЖ - Американската крајбрежна стража соопшти дека од изворот каде што во минатата недела потона нафтената платформа во Мексиканскиот Залив, истекува петпати повеќе нафта отколку претходно, како што се претпоставуваше. Контраадмиралот Мери Лендри изјави дека се верува оти дневно истекуваат 5.000 барели во морето, на 80 километри од брегот на Луизијана. Контраадмиралот Лендри посочи дека е откриено и трето истекување на локацијата.

Претходно, припадниците на крајбрежната стража запалија дел од нафтената дамка во обид да се спасат еколошки кревките мочуришта. „Контролираното палење“ на нафтената дамка се случи на област на околу 50 километри источно од делтата на реката Мисисипи, откриваат официјални лица. Дамката сега изгледа толку голема што се пресметува дека за помалку од два месеца би можела да биде еднаква на истекувањето на 11 милиони галони од нафтениот танкер „Ексон Валдез“ во близина на Алјаска во 1989 година. (Би-Би-Си)