Потрага по избеганиот руски шпион

Никозија - Кипарската полиција трага по осомничен руски шпион баран од САД, кој побегна помалку од 24 часа откако беше ослободен со кауција.

Педесет и петгодишниот Кристофер Мецос, кого американските власти го осомничуваат дека се занимавал со исплатата на мрежата руски агенти во САД, не се јавил во полиција во средата, нарушувајќи ги на тој начин условите за ослободување со кауција еден ден порано.

Во соопштението на полицијата се посочува дека Месоц е баран за „нарушување на судска наредба“.

Немаме информации каде може да биде, изјави полицискиот портпарол Михаил Кацунатос.

Според полициски извори, можно е Мецос да избегал во северниот турски дел на Кипар. Портпаролот на полицијата во Северен Кипар изјави дека полицијата нема информации оти Мецос влегол таму. 

Мецос е 11 учесник во шпионскиот скандал во САД. Тој беше притворен по барање на Интерпол во вторникот на аеродромот во Ларнака во обид да полета за Будимпешта. Истиот ден беше ослободен со кауција од 20.000 евра. Одземен му бил и канадскиот пасош. По наредба на судот Мецос беше должен секој ден меѓу 18 и 20 часот да се јавува во полицијата. Синоќа тој не се појавил.

Руските шпиони ги криеле шифрирани пораки во фотографии, јави ФБИ. Ова е првиот потврден случај на употреба на технолошки напредна форма на прикривање податоци.

Иако компјутерските експерти повеќе од една деценија говореа за постоење на оваа техника за комуникација, ова е првата јавно докажана употреба. (МИА)