Талибанците не преговараат со НАТО

Талибанците во Авганистан соопштија дека нема да влезат во преговори со НАТО додека странските сили не се повлечат од земјата. Во соопштението од бунтовниците доставено до Би-Би-Си се наведува дека тие веруваат оти имаат "предност" и се сигурни дека "победуваат". "Ние не сакаме да разговараме со никого - ниту со претседателот Хамид Карзаи, ниту со некои странци - се' додека странските сили не се повлечат од Авганистан", пишува во соопштението. "Ние сме сигурни дека победуваме. Зошто да зборуваме со некого ако имаме предност и странските сили размислуваат за повлекување, и има разлики меѓу високите офицери кај нашите непријатели".

Би-Би-Си објави дека "доверлив посредник" го добил соопштението од Забиулах Муџахед, портпарол на талибанците. Тоа се случи откако командантот на армијата соопшти дека Британија и нејзините сојузници нема да ги поразат талибанците со воена сила и наскоро ќе се отворат мировни разговори со бунтовниците. Генералот сер Дејвид Ричардс изјави дека верува оти е дојдено време за преговори со непријателите на НАТО за да се отвори пат за конечно повлекување на силите.

Началникот на Генералштабот изјави дека иако британските сили ќе продолжат да ги "казнуваат" талибанците од битка во битка, тој сега е "се' помалку сигурен" дека целосна победа може да биде извојувана. ("Телеграф")