Претходен број

Дали МБПР може директно да дава кредити?

Александар Пешев


Се разгледува опцијата Државната банка за поддршка и развој (МБПР) да добие законска можност директно да ги кредитира претпријатијата наместо да продолжи со индиректно кредитирање, преку банките, што беше случај досега. Оваа опција ја анализирала и Владата на една од своите седници.

„Ќе поддржиме една таква ситуација, но мора да видиме дали е тоа модалитетот што е најкорисен за македонското стопанство“, појасни вицепремиерот Зоран Ставрески. „Банката треба соодветно да се екипира, треба да си обезбеди стручни служби и служби за процена на ризикот доколку се оди на такво решение. Се разбира, начинот на процена на ризикот на проектите да биде идентичен со оној што го имаат комерцијалните банки, бидејќи се работи за десетици милиони евра кредитен потенцијал и битно е да биде максимално искористен во овие сложени економски времиња“, додаде вицепремиерот.

Владата, во консултации со стопанските комори и централната банка, ја разгледува можноста за реструктурирање на МБПР. Ставрески смета дека банката има потенцијал да го поттикне развојот на малите и на средните претпријатија во земјава и да го поддржи извозот. „Тоа се двата сегмента во кои банката може да биде најефикасна и во кои ваквите банки работат и во другите земји. На тоа нормално се надоврзува и осигурувањето на извозот и гаранциите за извоз“, рече Ставрески по вчерашната средба.

Претставниците од стопанските комори се надеваат дека со реструктурирањето на државната банка ќе има поевтинување на капиталот. „Со тоа би се направила структурна промена на македонското стопанство во смисла поголем дел од БДП да биде произведен во мали и во средни компании, со што би се зголемила виталноста на македонската економија и би се зголемил извозот“, посочи претседателот на Сојузот на стопанските комори, Мирче Чекреџи.

Претседателот на Стопанската комора, Бранко Азески, е оптимист дека ќе има законски измени во легислативата што ја регулира работата на државната банка. „Оптимисти сме дека ги имаме лоцирано сите точки што се потребни за едно поинакво редизајнирање на условите кои ги дава оваа банка во името на државата и дека наредната година тоа ќе биде од голема помош за извозните компании кои се наоѓаат во извонредно тешка ситуација и за малите и средните претпријатија“, подвлече Азески.

Гувернерот на Народна банка на Македонија, Петар Гошев, засега се воздржува од коментирање на очекувањата на Владата и стопанствениците. „Откако некои прашања ќе бидат ставени на хартија и откако ќе бидат разгледани, централната банка ќе го каже своето мислење во врска со предлозите“, рече Гошев.