Вечер на Густав Малер со Македонската филхармонија

Македонската филхармонија во рамките на интернационалниот оперски фестивал „Мајски оперски вечери“, вечерва ќе одржи концерт. Со концертот, што ќе се одржи во Салонот на Македонската опера и балет, со почеток во 20 часот, под диригентската палка на Пол Вајголд од Австрија ќе бидат одбележани 150 години од раѓањето на еден од најголемите мајстори на симфониската музика - композиторот Густав Малер.

Во чест на овој јубилеј, на концертот насловен „Вечер на Густав Малер“ ќе бидат изведени делови од неговите симфонии број 1 и број 5, а прв пат во Македонија интегрално ќе биде изведен вокалниот циклус за длабок глас и оркестар „Песни на патникот“, во кој како солист ќе настапи мецо-сопранот Ирена Кавкалевска. (Н.П.)