Павле изолиран во власта

Александра М. Митевска


Симптоматично прозвуче апелот на претседателот на Демократскиот сојуз, Павле Трајанов, за закажување лидерска средба пред претстојниот самит на НАТО и заседанието на Советот на ЕУ. Уште посимптоматичен беше одговорот на премиерот Никола Груевски, кој го одби барањето на својот коалициски партнер со речиси истата формулација што ја користи кога опозицијата ќе излезе со процени дека партиските водачи треба да седнат на заедничка маса за да ги разгледаат прашањата од кои зависи меѓународното позиционирање на државата. „Лидерски средби се организираат кога има потреба за тоа. Во оној момент кога ќе имаме нешто ново или некаква потреба, сигурно ќе организираме таква средба“, рече Груевски. Со образложение дека проширувањето не е тема на ноемврискиот самит на Алијансата во Лисабон, и кабинетот на претседателот, Ѓорѓе Иванов, не покажа разбирање за предлогот на ДС да се изгради заедничка платформа за интегрирање на Македонија во НАТО и за почнување на преговорите со ЕУ.

Всушност, прашањата поврзани со евроатлантското интегрирање на Македонија веќе подолго време не се тема за која на заедничка маса дискутираат лидерите на партиите од власта и од опозицијата. Ниту декларативниот консензус по ова прашање ниту постојаното усложнување на процесот не се доволни провокации за државниот врв да се сретне со политичките противници. Од тој аспект, неуспешната мисија на Трајанов немаше да биде изненадување да не стануваше збор за човек и за партија од таборот на власта, односно за партнер во дваесетчлената коалиција на ВМРО-ДПМНЕ. Затоа уште поголемо изненадување беа квалификациите што владејачкиот пратеник ги наведе како причина за иницирање на лидерската средба: „Македонија се движи во политичка, како и во економска изолација, која ќе има негативни рефлексии врз севкупните состојби во земјава на политички и на безбедносен, пред се', на социјален план“.

Дали ваквите настапи на пратеници од коалицијата „За подобра Македонија“ се сигнал за одредени раздвижувања во владејачкиот камп?

„Тешко нам ако Трајанов треба да ги потсетува претседателот и премиерот до каде е дојдена ситуацијата, ако тој треба да им укажува на она што е очигледно - дека работата е нож до коска“, коментира потпретседателот на СДСМ, Гордан Георгиев. За изјавата на премиерот дека средба ќе има кога ќе има нешто ново да се соопшти, Георгиев вели дека очигледно нема ништо ново, бидејќи ништо не се работи на планот на евроатлантското интегрирање. „Во таков случај и јас не гледам смисла во тоа да правиме седенки, само за да се пие кафе и потоа да се спинува јавноста“.

Трајанов вчера ни изјави дека нема разногласие меѓу него и ВМРО-ДПМНЕ и оти ДС е самостојна партија што може да настапи со свој став. Пред околу една година оваа партија излезе и со предлог-декларација за решавање на проблемот со името, при што се предлагаше фазно решавање на долгогодишниот спор. Трајанов вели дека премиерот ја дал изјавата за лидерската средба пред ДС да излезе со својот предлог. Според тоа, изјавата на Груевски не се однесувала конкретно за иницијативата на ДС.

„Македонија е изложена на своевиден притисок и како резултат на тоа земјата оди кон изолација. Да го немавме спорот за името, сето ова немаше да се случува“, појасни вчера Трајанов.