Тачи му ги брои парите на Аџиев

Лидерот на ДПА најавува итна лустрација на првиот лустратор

Оливера Војновска


Лидерот на ДПА, Мендух Тачи, вчера отворено се посомнева дека претседателот на Комисијата за лустрација, Томе Аџиев, се збогатил благодарение на лустраторска функција. Тачи вели дека „Аџиев не е свесен што ќе го снајде“ и најавува негова „итна лустрација“, со која, наводно, ќе се обелодени дека првиот лустратор тежи најмалку половина милион евра. Аџиев ги негира ваквите обвинувања и тврди дека е „чист како солза, дека мирно спие и нема дополнителни приливи на неговите сметки“. Според него, Тачи е пропаднат политичар и по секоја цена сака да се врати во политиката.  Челникот на ДПА вчера при посетата на Исламската верска заедница, жестоко го нападна претседателот на Комисијата за верификација на фактите. „Ќе го лустрираме и него и ќе откриеме многу цифри во неговите банкарски влогови: 300.000, 400.000, 500.000 евра. Многу брзо ќе одиме на суд, а ќе одиме и на друго место. Претседателот, бидејќи е неспособен од секој аспект, не знае дека постои друга многу итна процедура со која тој ќе се најде во многу тешка ситуација. Тој сигурно потпирајќи се на гаранции на некој од Владата, мисли дека судскиот процес може да трае четири-пет години. Ве уверувам дека процесот ќе почне за седум-осум дена и тој ќе се чуди што ќе му се случи“, изјави Тачи, коментирајќи ја изјавата на Аџиев дека тој и неговиот адвокат не го знаеле Законот за лустрација. Лидерот на ДПА уште кажа дека членот на Комисијата Агим Мехмети (кој е предложен од ДПА, но не е нивни член) ќе се повлече од функцијата, бидејќи „е јасно Комисијата работи по директива на власта“. Тачи не го интересира тоа што лидерот на ДУИ, Али Ахмети го нарече „лудак жеден за власт“ и нагласи дека повеќе нема да коментира „докажани удбаши“!

Аџиев не е изненаден од настапот на Тачи, бидејќи, како што вели, тој е излезен од политиката и бара начин како повторно да се и' врати“.

„Тоа се целосни невистини. Моето семејство е чесно. Имотот со кој располагам е спечален со труд и е стекнат уште пред да дојдам во Комисијата за лустрација. Откако сум во Комисијата, нема дополнителни приливи и промени во капиталот. Имам трансакциска сметка и штедна книшка на која износот се менува само од каматата. Тоа може многу лесно да се провери“, вели Аџиев и додава дека не сака да се занимава со обвинувањата на Тачи.

Деновиве Комисијата за верификација на фактите побара од Собранието измени на Законот за лустрација во неколку негови одреби. Меѓу другото, се бара Законот да не важи само до 1991 година, туку до денеска. Комисијата ја наведува и потребата од дообјаснување на поимите „соработник“, „наредбодавател“ и „корисник на информации“. Во однос на поимот „соработник“, се бара да се доопрецизира дали за евентуалниот соработник е доволно да се утврди само име и презиме или и псевдонимот.

Лустраторите бараат во Законот да се прецизира дека трети лица можат да доставуваат документи во Комисијата, но само оригинали. Во образложението се вели дека со оваа измена би се из��егнало злоупотребувањето на процесот на лустрација со поднесување на какви било списи, акти, конструкции...

Предлогот на лустраторите доаѓа откако во дворот на тетовскиот професор Шпенд Љуши никнаа досиејата за „Вујко“, „Мама“ и „Стрелец“, а потоа во „Дневник“ беше доставено досието „Ибар“, кое вод�� до врвот на ДУИ. Интегративците вчера до сите пратенички групи доставиле предлог- декларација со која бараат уличната лустрација да биде осудена, а институциите да не дозволат да бидат прекршени основните човекови права. (О.В.)