Колку тежи претседателот на Комисијата

Според податоците во анкетниот лист што го доставил претседателот на Комисијата за лустрација, Томе Аџиев, во Антикорупциската комисија, тој располага со имот вреден околу 400.000 евра.

Аџиев има заеднички недвижен имот: деловен простор од 21 квадратен метар во Битола, куќа од 160 квадрати, исто така во Битола и стан од 50 квадрати во Охрид. Тој поседува благородни метали во вредност од 500.000 денари, уметнички и колекционерски предмети вредни 350.000 денари. Аџиев има еден автомобил марка „рено седан спорт 1.5 ДЦИ“ од 2006 година, кој чини 1.078.410 денари. Првиот лустратор има две штедни книшки во ТТК банка со близу 7,5 милиони денари.

Аџиев побарува по основа на даден заем околу 2,5 милиони денари. Претседателот на Комисијата поседува и хартии од вредност од околу 30.000 денари, лични примања - пензија од 16.000 денари, но има и кредит од околу половина милион денари што ќе го отплаќа до 2014 година.