Анкета: Референдум за името тешко дека ќе успее

Повеќето граѓани - 46,4 проценти позитивно го оцениле извештајот на ЕК за Македонија, наспроти 28,4 проценти, кои дале негативна оценка, додека 25,4 немале одговор. До такви резултати дошол Институтот за политички истражувања во анкетата што е спроведена од 12 до 15 ноември со 1.111 испитаници. Влезот на Република Македонија во НАТО и во ЕУ го поддржуваат 79,8 проценти од анкетираните, но на прашањето дали на референдум би поддржале промена на името со цел да станеме членка на ЕУ и на НАТО 62,6 отсто одговориле со „не“, наспроти 30,7, кои би поддржале ваква опција.

Целта на анкетата била да се увидат перцепциите на граѓаните за евроатлантските интеграции и прашањето за името и како овие политики се одразуваат врз рејтингот на политичките партии и нивните лидери.

ВМРО-ДПМНЕ има највисок рејтинг - 23 проценти, додека поддршката за Никола Груевски е 23,5. СДСМ го поддржале 11,5 отсто од испитаниците, а Бранко Црвенковски 9,2. ДУИ има 6,5 проценти, а рејтингот на ДПА е 2,9, додека Нова демократија добила 1,4 отсто доверба. Во Али Ахмети најголема доверба имаат 6,8 отсто, во Мендух Тачи 3,4, а во Имер Селмани 2,3 отсто. (П.Р.)