Претходен број

ИНТЕРВЈУ

Не живеам во филм, туку во реалност

Љубе Бошкоски, потенцијален кандидат за претседател на државата

Гордана Дувњак



Г-дине Бошкоски, во последниве пет месеци ја поминавте цела Македонија, а редовно Ве гледаме и на сите јавни настани. Дали созреа Вашата одлука за враќање на политичката сцена?

Веќе е речиси минута до дванаесет кога треба јавно да се изјаснам околу моето дефинитивно враќање во македонската политика. Иако е сосема извесно дека наскоро повторно ќе се активирам на политичката сцена, допрва ќе одлучам дали тоа ќе биде како претседателски кандидат или во некоја друга форма. Сепак, станува се' поизвесно дека мојата идна политичка активност ќе биде - првото. Во секој случај, одлуката ќе ја донесам овие денови. Имав доволно време да го сондирам расположението на теренот и да го слушнам гласот на народот.



Кој очекувате да застане зад Вашата кандидатура?

ВМРО-ДПМНЕ е мојата матична партија и јас и' припаѓам на таа идеолошка матрица. Како еден од основачите и идеолозите на партијата, кој има подолг стаж од колку што некои министри имаат години, сметам дека имам апсолутен кредибилитет да бидам кандидат на мојата партија.



Како го објаснувате тоа што три месеци до претседателските избори партиите се' уште не ги откриваат своите адути?

Македонските политичари, но и оние од Балканот, имаат интересен ментален склоп. Постојано говорат дека се за прифаќање на вредностите на западните демократии, но во практика имаме тотален парадокс. Замислете една сериозна држава, која е претендент за НАТО и за ЕУ, три месеци пред изборите нема истакнато ниту една кандидатура. Тоа е проблем со лидерите на овие наши простори, кои се неподготвени и нерешителни да одговорат на предизвиците што ги носи една ваква важна функција. Не може преку ноќ да се исфрли нов�� лице и да се каже дека тој ќе биде новиот претседател, само затоа што зад него застанала цела партиска машинерија, без разлика дали е од ВМРО-ДПМНЕ или од СДСМ. Ќе имаме претседател, кој го избира народот, а народот воопшто и не го познава. Не е сеедно во овие тешки и турбулентни времиња кој ќе ја води Македонија.



Зошто решивте да и' дадете предност на политиката, иако над глава Ви виси судскиот процес во Хрватска и Ве очекува жалбената постапка во Хаг?

Случајот јасно заврши со ослободителна пресуда. Не е возможно ниту чудо за да има негативен пресврт. По средбата на македонскиот и хрватскиот обвинител, очекувам и случајот „Раштански Лозја“, конечно, да се затвори, бидејќи се докажа парадоксот дека во мојот случај и нема случај.



Зошто мислите дека предметот ќе се врати во Македонија?

Или ќе се врати или ќе се затвори во Хрватска. Според моите информации, судското рочиште во февруари ќе биде одложено за да се дефинира повлекувањето на обвинението. Во прашање е само кога тоа ќе се случи. Ова ви го кажувам според информациите што ги имам.



Како мислите да ја придобиете наклонетоста на Албанците, како и довербата од меѓународната заедница?

Разговарав со многу дипломатски претставници во Македонија. Не очекувам нивна директна поддршка, но ни некаква пречка од нивна страна. Свесен сум за својата популарност, со сиот респект спрема анкетите. За време на моите посети во градовите, можев да видам каков е односот на Албанците спрема мене. Убеден сум дека е стопен мразот, а недовербата постои само во некои радикални кругови. Не сакам на Албанците да им се наметнам со лажни ветувања и со пароли. Не сакам да гледам на Албанците како на некаква гласачка машинерија, која по налог на некој локален моќник треба да става гласачки ливчиња во кутиите за мене. Сакам Албанците да ме доживеат како вистински пријател, зашто тоа сум бил отсекогаш со нив. А, тоа што во минатото имаа искривена перцепција за мене, не е моја вина. Во меѓувреме, јасно се докажа дека сум бил жртва на драматизирана, исфорсирана медиумска кампања, полна со дезинформации, кои водеа кон лажен впечаток. Јас го бранев Уставот, поредокот и интегритетот. Ниту еден мој потег немаше меѓунационална омраза и не ги надминав ингеренциите. Дури ниту Хашкиот трибунал, кој цели шест години го опсервираше случајот „Љуботен“, не можеше да најде ниту збор на говор на омраза. Можеби звучи нескромно, но сметам дека е урната бариерата. Времето на блефери, артисти и циркусанти во политиката е минато за Македонија. Граѓаните, без оглед на нивната верска и национална определеност, треба да изберат човек во кој веруваат. Тоа нема да биде избор по директива. Тоа може да се случи на изборите за градоначалници, за советници или на евентуалните предвремени парламентарни избори.



Зар очекувате нови парламентарни избори само шест месеци по предвремените?

Она што реално го гледам на теренот ми дава за право да мислам дека ако не во 2009, тогаш во почетокот на 2010 година мора да има предвремени избори. За жал, ситуацијата во Македонија воопшто не е розова и не ни цветаат рози на економски, политички план, како ни во делот на надворешната политика. Зар треба да сме економски експерти за да ги согледаме реалните проблеми во Македонија?



Колку се согласувате со оценките на претседателот Бранко Црвенковски дека Македонија се наоѓа пред историски пораз, дека демократијата е загрозена и одиме кон авторитарно владеење?

Како човек кој никогаш не бил полтрон и има право да критикува, сметам дека за многу состојби придонесе и актуелниот претседател. Во Гинис нема да влеземе само со прилепските сарми, туку и со маратонската транзиција. Но, ако власта постојано се навраќа на пропустите на опозицијата и бара алиби за сопствената неподготвеност да ги решава проблемите, се поставува прашањето за што се освоени гласачите.



Што е она што Ве разочарува во владеењето на ВМРО-ДПМНЕ?

Неможноста да се најде модус вивенди што ќе обезбеди Македонија да стане пристојно место за живеење. Живееме во виртуелен свет, во кој од кабинетите се обидуваат да не' убедат колку ни е убаво.



Како го објаснувате фактот што живееме се' полошо, а рејтингот на Владата и премиерот е се' повисок?

Не сакам да верувам дека сме влегле во мазохистичка фаза и уживаме да бидеме малтретирани и гладни. Сигурен сум дека премиерот искрено верува дека може да направи нешто подобро за Македонија и затоа се обидува да ��а држи во кондиција надежда на граѓаните.



Постои верување дека Груевски е човек кој не сака да ја дели власта со никого и оти затоа е толку претпазлив при одбирањето кандидати за претседател?

Не сум оптоварен со тоа што е грижа на Груевски, туку со она што е проблем на народот. Не заради популистички цели, туку поради реална процена. Не е популизам ако кажете дека имаме бројни проблеми и многу отворени прашања.



Некои аналитичари гледаат на Вас како на некаков тројански коњ на опозицијата кој треба да ги раситни вмровските гласови?

Не сакам да коментирам туѓи ставови, посебно не на новинарите. За мене не е важно во какви комбинаторики ме ставаат. Ми импонира тоа што на моите средби доаѓаат и членови на опозицијата и непартиски луѓе. Тоа ми дава сила да преземам некои смели чекори, иако сум свесен за опструкциите што ми се прават.



Кој Ви прави опструкции?

Секогаш тие доаѓаат од оние кои се на власт. Но, и Никола и Бранко, и Љубе ќе мора еднаш да сфатат дека ќе оставиме белег на едно време, само ако направиме нешто добро за земјата. Ако нашата логика оди во насока на тоа да направиме нешто само за себе, за својот висок рејтинг и за политичка кариера, а ги заборавиме граѓаните, ќе не' стаса казната. Не можеме денес да зборуваме дека не даваме да се промени името, да зборуваме за античка Македонија, Александар Македонски, за Хунзите, а да заборавиме на реалните проблеми. Овие теми треба да им ги оставиме на историчарите, а да се фокусираме на решавање на проблемот со името, што ќе ни овозможи влез во НАТО и во ЕУ, доаѓање странски инвестиции и итн. Како што мене ми припадна честа да бидам хашки затвореник, на оваа Влада и' припадна честа и одговорноста да го реши проблемот со името .



До кога ќе го чекате одговорот на Груевски за да Ви каже какви се неговите намери?

Моја должност е како член на ВМРО-ДПМНЕ јавно да му подадам рака на мојот премиер и претседател на мојата партија, но претходно и да го предупредам за сите промашувања што му се случуваат. Сакам да му понудам визија за излез од оваа криза, а негово е дали ќе прифати. Има прашања за кои најотворено морам да разговарам со премиерот, бидејки повторно станувам реалност на македонската политичка сцена и не можам да бидам игнориран. Очекувам да дојде до средба, во име на добра соработка и подобра иднина на Македонија. Премиерот е прв кој ме дочека во Македонија, нашите релации не се воопшто заладени и покрај медиумските шпекулации. Јасно е дека нема да формирам нова партија. Најважно е дека граѓаните масовно и отворено бараат мое лично политичко активирање, кое не можам и не смеам да го игнорирам.



Не се плашите дека можете повторно да влезете во филм како во минатото?

Не, цврсто газам на земјата. Претходниот пат, почесниот лидер на ВМРО-ДПМНЕ ми предложи да прифатам кандидатура, но ова што сега го правам не е затоа што јас го барам тоа. Има потенцијални кандидати кои бараат поддршка од неколку партии, само затоа што сметат дека биле многу талентирани во дипломатијата. Јас не живеам во филм, туку во реалност.