ДИК на готовс за предвремена кампања
Државната изборна комисија итно ќе заседава доколку забележи предвремен почеток на кампања, најави претседателот Александар Новакоски на вчерашната седница на ДИК. Такви активности досега не биле забележани, а немало ни официјален предлог од политичка партија или институција.
„Во Комисијата не е примен предлог за предвремена кампања. Досега немаме такви сознанија, освен некои коментари дека е почната кампањата“, изјави претседателот на ДИК.
Тој нагласи дека се' уште не се знае точниот датум на одржувањето на локалните и претседателските избори планирани во март 2009. „Изборите не се распишани. Тоа е во надлежност на Собранието. Кога ќе се случи тоа, ДИК ќе донесе роковник“.
Експерти по изборно право ја повикаа ДИК да изработи правилник со упатства за изборни нерегуларности, за кои Изборниот законик не е прецизен.
На вчерашната седница Државната изборна комисија од своите редови конституира повеќе работни групи. Станува збор за групи за едукација на изборни органи и граѓани, за обрaсци за спроведување изборен процес, избирачки список, гласачко ливче, јавни набавки...
Во текот на наредната година се очекува ДИК да се пресели во нови простории во зградата на „Нова Македонија“ што и' ги додели Владата. „Со новиот деловен и магацински простор ќе има услови за непречена работа“, велат во ДИК. (К.Ч.)
|
