Почна комисиското тресење на ребалансот

Владата да го преработи ребалансот на буџетот, бидејќи вака скроен ��ема да одговори на економската криза, порачаа опозициските пратеници на вчерашната Комисија за економски прашања, каде почна расправата за предложеното прекројување на државната каса. Според предложените измени, вкупните расходи во Министерството за економија се скратени за 25 проценти.

„Капиталните проекти се намалени за 239 милиони денари или за 40 проценти“, објасни Методи Хаџи Васков, заменик-министер за економија.

Според опозицијата, во услови на криза нелогично е што се крати од проекти клучни за развој. „Катастрофа, се убива и тоа малку што може да внесе дух во економијата“, смета Ристо Пенов од ЛДП.

„Се удираа темели на економските зони, а сега од нив се кратат 150 милиони денари“, истакна Марјанчо Николов од СДСМ. Со ребалансот вкупниот буџет се намалува за 76 милиони евра. Собраниската расправа во матичната Комисија за финансирање и буџет почнува в понеделник. (А.С.)