Шведска најздрава, а Грција „тешко болна“

Кога е во прашање „стопанското здравје“, Шведска е во врвна конд��ција, додека Грција е „тешко болна“, покажува вчера објавениот индекс на европската економска одржливост.

Според Европскиот политички центар, кој ја направи листата, Шведска го зазема првото место со 0,55 индексни поени, па следуваат Данска, Естонија и Финска со резултати меѓу 0,45 и 0,42 индексни поени. Во „висока стопанска форма“ се и Холандија, Германија, Луксембург и Австрија, со резултат од 0,28 до 0,20 индексни поени.

Во „златната средина“ се наоѓаат седум земји: Велика Британија, Чешка, Словачка, Полска, Белгија, Бугарија и Франција, чиј резултат се движи од 0,7 до минус 0,03 индексни поени, се наведува во извештајот на ЕПЦ. Во опасност се наоѓаат стопанствата на Ирска, Словенија, Кипар, Литванија, Малта, Унгарија, Романија, Летонија и Шпанија, кои се движат меѓу минус 0,08 и минус 0,23 индексни поени, додека неодржлива здравствена состојба имаат стопанствата на Португалија со минус 0,29, Италија со минус 0,38 и Грција, чиј резултат изнесува дури минус 0,93 индексни поени. ЕПЦ секоја земја ја оценува во шест области.

Скалата се составува врз основа на анализата на буџетскиот дефицит, националниот долг, економскиот пораст, конкурентноста, државната управа и корупцијата и трошоците за нега на повозрасните граѓани. Грција не само што се наоѓа на дното туку е и многу блиску до тоа да биде најлоша земја во сите шест области на индексот, се додава во извештајот на ЕПЦ. (МИА)