Стечајците ќе се крстат само во опозицијата

Стечајците, дефинитивно, се свртуваат кон опозицијата и отсега само од неа ќе очекуваат помош. Унијата на стечајни работници УНИТ од Куманово, во иднина решение за статусот на членството ќе бара во соработка со опозицијата, најави вчера Лилјана Георгиевска, претседател на УНИТ.

Одлуката за поддршка на опозицискиот фронт, според Георгиевска, е донесена на состанок на координаторите на разграноците на Унијата од целата држава откако завчера на седница на собраниската Комисија за финансирање и буџет владејачката ВМРО-ДПМНЕ се изјасни оти нема да го поддржи законот за решавање на статусот на стечајците, поднесен од опозициската СДСМ. „Повеќепати побаравме Владата да го реши нашиот статус, понудивме повеќе форми на соработка, но немаше никаков слух за нашите барања“, изјави Георгиевска. Според неа, УНИТ ќе побара гаранција за решавање на нивниот статус од опозициските партии со потпишување спогодби.

Членовите на УНИТ бараат државата со закон да им обезбеди месечен надомест од 6.000 денари до следно вработување или пензионирање, а со кое ќе бидат опфатени жени на возраст до 50 години и мажи до 53. На последната средба на претставници на УНИТ со владиниот економски тим им било укажано дека веќе е донесен Закон за материјално обезбедување. (Ек.Р.)