Евроскептицизмот - инструмент на власта

Фактот дека за граѓаните е поважно името од ЕУ - алиби за нерешавање на спорот

Александра М. Митевска

Власта си обезбеди добро алиби за нерешавање на спорот со името, дури и по цена на натамошно загрозување на евроатлантските перспективи на државата, со пласирањето на анкетата на Институтот за политички истражувања, според која, постепено расте евроскептицизмот меѓу граѓаните.

Во анкетата, што е реализирана по нарачка на Секретаријатот за европски прашања, посебно индикативни се резултатите, според кои за 66,5 проценти од граѓаните е поважно да се зачува уставното име, а само 26,2 отсто мислат дека е приоритет членството во НАТО и во ЕУ.

За актуелната власт, за која се знае дека многу држи до анкетите, ова може да претставува издржан аргумент дека е исправна нејзината политика на одбрана на името и на барање предавници во опозициските редови, кај медиумите, во невладиниот сектор...

Поранешниот вицепремиер за европски прашања, Ивица Боцевски, смета дека анкетата на СЕП е скандалозна и оти мора да се даде отчет кој ја нарачал и платил, кој ги составувал прашањата и кому му е потребно да го спори европскиот идентитет на македонската нација, во период кога Македонците жилаво се борат за датум за преговори и кога токму европските вредности ни се главен аргумент во спорот за името.

„Современиот демократски македонски идентитет почива на европските вредности и современиот македонски патриотизам е борба за ‘враќање’ на Македонија во европското семејство. Фактот што институцијата, која е воспоставена да го реализира овој стратегиски и патриотски проект, излегува со скандалозна анкета каде што Македонците се изманипулирани да не се изјаснат како Европејци е невиден срам“, вели тој.
Политикологот Дане Талески, член на ИО на СДСМ, вели дека одговорна власт би работела на промена на матрицата на размислување, односно дека би се обидела да создаде чувство кај граѓаните дека се победници во секој случај.

„Место тоа, власта креира обратна перцепција кај граѓаните - дека ќе бидат се губитници во секој случај. Дека ако влезат во ЕУ ќе го изгубат името, а ако го зачуваат името ќе ја изгубат ЕУ. Тоа е типично за политиката на Груевски, која прави жртви од граѓаните. Тоа е политика на виктимизација“, оценува Талески.

На листата на виновници за македонскиот од во место на патот кон Брисел би можела да се најде и меѓународната заедница. Пратеникот на ВМРО-ДПМНЕ, Александар Спасеноски, на вчерашната промоција на триесеттото издание на списанието „Политичка мисла“, го наметна прашањето за улогата на меѓународната заедница во евроинтеграцискиот процес на Македонија.

Според него, науката треба да даде попрецизни одговори од политиката на прашањата зошто земјата се' уште не е во ЕУ, какво влијание има спорот за името, каква е улогата на меѓународната заедница во Македонија во однос на евроинтеграциите и дали е таа секогаш докрај принципиелна кон тој цивилизациски проект. Науката, како што рече Спасеноски, треба да понуди и одговор која е улогата на МАНУ и на интелектуалците, односно дали тие доволно и исправно и' помогнале на државата во интеграцискиот процес.

Евроамбасадорот Ерван Фуере, пак, е оптимист дека членството во ЕУ останува приоритет за македонските граѓани. Тој вчера изјави дека резултатите од истражувањето на СЕП, според кои опаднала поддршката на граѓаните за интеграција во ЕУ, се спротивни на претходните истражувања кои покажувале дека има огромна поддршка за процесот.

„Не мислам дека преовладува скептицизам. Секаде се чувствуваат огромната поддршка за ЕУ и желбата да се биде дел од тоа семејство на народи. Ако постои таков скептицизам, тогаш тој претставува незначително малцинство. Но, генерално гледано, мислам дека граѓаните сакаат да ја видат земјата како дел од ЕУ“, истакна Фуере.

Евроамбасадорот посочи дека ЕУ е посветена на реформскиот процес и дека нејзината поддршка изнесува околу 80 милиони евра директна помош. Фуере повика на отворен политички дијалог во државата, бидејќи „властите треба да вложат поголеми напори за да се остварат аспирациите на граѓаните“. Од СЕП, пак, вчера повторно ја лиферуваа анкетата, но притоа напомнаа дека поддршката за влез на Македонија во ЕУ и натаму е исклучително висока, бидејќи 75 проценти од испитаниците се изјасниле во таа насока. (А.М.М.)