Поглед

Ништо лично со Мизо

Соња Маџовска

Зошто новинарите секогаш се виновни за се'? Зошто политичарите и директорите, особено на државните институции, не можат да разберат дека додека се на јавна функција, мора да даваат отчет и за успешно сработеното и за неисполнетите ветувања?

Ако е нешто добро, и да сакаш - не можеш да го критикуваш, но ако е нешто лошо и нереализирано, па не може да се правиме дека не го гледаме. Едно нешто што е проблематично кај политичките фигури и што ги прави незрели за функцијата е тоа што мислат дека оној што ги критикува има нешто лично против нив. Зошто не сфаќаат дека утре, кога ќе си заминат од функциите, ќе бидат неважни за јавноста и никој за ништо ниту ќе ги критикува ниту ќе ги фали, освен нивните најблиски дома.

А деновиве директорот на Агенцијата за странски инвестиции, Виктор Мизо, токму така се однесуваше, нервозно и лично. А го прашавме само колку економско промоторски места укинала Агенцијата, колку промотори се повлечени и какви препораки им дале при нивната последна посета на Скопје во трката по странски инвеститори по светот?

Прашањата не беа лични. Ниту го прашавме директорот Мизо што прави во своето слободно време, ниту каде излегува, ниту со кого се дружи, иако јавноста сака и вакви пикантерии да слушне за приватниот живот на нашите политичари. А токму од Мизо се очекуваше да биде поинаков во пристапот кон јавноста, со оглед на тоа што голем дел од својот живот поминал надвор од земјава. А во почетокот на неговото директорување со Агенцијата и навидум беше таков, се' додека не стана јасно дека ништо не оди со инвестициите. Е, после новинарите биле виновни што пишуваат постојано дека и по четири години, не доаѓаат инвеститори и тоа што работата на задолжените да ги донесат во земјава не може да се види.