Целиот државен врв го славеше денот на ВМРО

И годинава не се појави опозицијата која на празникот гледа како на партиско одбележување

Жаклина Хаџи-Зафирова


Со Свечена академија се заокружи овогодинешното петто одбележување на 23 октомври - Денот на македонската револуционерна борба. Државниот празник и годинава беше бојкотиран од опозици��ата со образложение дека се работи за партиски празник на владејачката ВМРО-ДПМНЕ. Централната прослава беше во Скопје, но празникот се одбележа и во Прилеп, каде што беа организирани повеќе манифестации. На локално ниво, празникот го одбележаа локалните организации на ВМРО-ДПМНЕ, некои од нив симболично со организирање турнир во мал фудбал.

Повеќето министри во неделата се поклонија и положија цвеќе на спомениците на Гоце Делчев и на Даме Груев, а речиси во исто време скромна министерска делегација се појави за да положи цвеќе пред тукушто промовираниот Споменик на загинатите бранители на Македонија во 2001 година, лоциран во паркот „Жена-борец“ спроти Собранието.

По положувањето цвеќе, министрите заминаа на доделувањето на државната награда „23 Октомври“ за долгогодишни остварувања во областа на науката, културата, образованието, заштитата на државните интереси и промоција на државните приоритети, вредности и културно-историско наследство на Македонија.

„Дваесет и трети октомври не е само еден обичен ден. На овој датум во 1893 година е формирана организацијата што ќе го промени текот на македонската историја. Денес го прославуваме основањето на славното ВМРО и се сеќаваме на заложбите на татковците на организацијата, кои силно верувајќи во достижноста на слободата, решија да ги земат работите во свои раце и преку лична жртва да ја обезбедат македонската независност и достоинство. Поради тоа, 23 Октомври е ден што заслужува достојно одбележување - денес и засекогаш“, порача првиот парламентарец, Трајко Вељаноски, во обраќањето на Свечената академија по повод 23 Октомври, на која присуствуваше целиот државен врв.

Во својот долг говор, Вељаноски нагласи дека создавањето на ВМРО е можеби најважниот момент во македонската историја. Тој смета дека празнувањето на 23 Октомври е неопходно и затоа што тоа претставува најдобар начин државата да им искаже благодарност на сите припадници на ВМРО од 1893 до 1990 година, кои биле убиени, следени или лежеле по затворите.

„Основачите на ВМРО ни оставија една многу важна порака која останува вистинита и по еден век - никогаш не чекајте некој друг да ви ги реши проблемите. Решението лежи во нас самите“, истакна Вељаноски

Претходно, поширока владина делегација, во придружба на претставници од неколку институции, положи цвеќе пред спомениците на Гоце Делчев и на Даме Груев на плоштадот „Македонија“. Додека во паркот „Жена-борец“ министерот за земјоделство, Љупчо Димовски, придружен од својот заменик, Зоран Коњановски, дојдоа за да положат цвеќе пред новиот Споменик на загинатите бранители од 2001 година. На Споменикот се испишани имињата на вкупно 75 бранители што загинаа во конфликтот во 2001 година. Споменикот е изграден со одлука на Општина Центар и по идејно решение на скулпторот Киро Мукаедов.

„Десет тажни години од војната во 2001 година во која прерано загинаа нашите деца, сопрузи и татковци за одбрана на територијалниот интегритет и суверенитет на Македонија. Судбината ги откорна од нас и од радоста на животот. Нам ни останаа солзите, тагата, болката и спомените за најмилите“, рече Владо Стојанов, претседател на Здружението на семејствата на загинатите бранители, обраќајќи се во име на роднините. Тој се заблагодари за се' што направиле Владата и Собранието за семејствата, но очекува загинатите бранители во 2001 година да добијат статус на борци и постхумно да бидат прогласени за херои на Македонија, како и борците од Втората светска војна. Според него, досега се задоволени 98 отсто од барањата на роднините на загинатите бранители, а остануваат да се исполнат уште мал дел барања. За разлика од него, Марин Најдов од Здружението на бранители „Достоинство“ изјави дека бранителите се маргинализирани.

„Барањата за бранителите не само што не се остварени туку не се ни начнати за остварување. Тие и борците се најмаргинализирана група во оваа држава“ рече тој.

Годинешната државна награда „23 Октомври“ им беше доделена на професор д-р Томе Неновски, писателот Паскал Гилевски и на ликовниот уметник Коле Манев.