За средношколците 19 милиони евра од СБ

Децата што посетуваат редовно средно училиште, а потекнуваат од семејства приматели на социјална помош, ќе добиваат по 12.000 денари годишно за потребите за школување. Средствата се обезбедени од Светска банка, а договорот вчера го потпишаа вицепремиерот и министер за финансии, Зоран Ставрески, и претставникот на Светска банка во Македонија, Маркус Репник.

Со договорот Македонија добива 19 милиони евра. Рокот на отплата е 25 години, со седум години грејс-период и варијабилна каматна стапка, која е приближно еден процент. Потенцијалните корисници на овие средства се проценуваат на 18 до 20 илјади, а услов за да ги добијат е да се редовни ученици и да го завршат образованието.

„Цел на проектот е да им помогнеме на сиромашните семејства да ги испратат децата во средно училиште, да може да ги извадиме од сиромаштијата“, рече министерот Ставрески, кој додаде дека тоа е и поддршка на мерките на Владата за задолжително средно образование.

Според претставникот на Светска банка, Репник, ова е значаен проект, особено во услови на светска економска криза, со кој се штитат најранливите категории граѓани. Бенефициите од проектот, како што рече тој, ќе се почувствуваат откако ќе помине кризата.

Репник смета дека успехот на проектот не зависи само од Владата, која прави значајни чекори на овој план, туку и од секој граѓанин на Македонија, кој има деца и треба да вложи напори за да им обезбеди образование. Македонија е прва земја во регионот со ваков проект. Се спроведувал во Мексико и во Бразил пред 10 години, како и во некои други земји, кои имаат позитивно искуство. (МИА)