Како ќе се изградат автопатиштата без возила

Груевски потврди дека за Коридорот 8 потенцијалните концесионери не добиле кредит од ниту една банка

Сања Наумовска



Како ќе се изградат македонските автопатишта? Високо на листата на приоритети се наоѓаат само додека се на хартија, но во праксата се докажува дека многу тешко се прави километар асфалт. Сведоци сме дека во последните години Македонија е на дното на листата меѓу земјите од регионот во инвестирањето во нова патна и железничка инфраструктура. Почетокот на изградбата на последната делница од автопатот на Коридорот 10, од Демир Капија до Смоквица е еден од ретките проекти кој по подолго време почна со реализација.

Затоа, пак, сите најави дека ќе се инвестира во алтернативниот Коридор 8 од Бугарија до Албанија, завршија неславно. Ниту еден концесионер не ги сака нашите патишта без автомобили. Тоа викендов го потврди и премиерот Никола Груевски, кој најави дека Владата сама ќе бара кредити за да ги гради. Под концесија повторно ќе се понудат само два помали, но поатрактивни патни правци за автопатишта, Гостивар - Кичево и Скопје - Блаце.

Експертите, пак, инсистираат дека изградбата на инфраструктурата мора да се интензивира, без разлика на лошите статистики за фреквентноста на патиштата. За Коридорот 8 одамна има готови проекти, кои требало веќе да се најдат на агендата на Владата.

„Приоритети треба да се направат само во однос на тоа кој автопат порано, а кој подоцна да се изгради, а не дали да се гради или не. Без разлика на тоа што проекциите укажуваат на слаб проток на возила по овие патишта, ако и покрај тоа се направи автопат, тој сам ќе си привлече сообраќај“, коментираат експерти.

Според премиерот Груевски, обидот за изнаоѓање концесионер за изградба на автопатишта од Скопје до Кочани, од Гостивар до границата со Албанија, од Куманово до Бугарија, како и од Скопје до косовската граница, и покрај тоа што понудиле големи субвенции за концесионерите, пропаднал поради малиот број на автомобили кои се движат по патиштата. Фирмите не успеале да обезбедат кредит од ниту една меѓународна банка. Сепак, Груевски се надева дека Владата ќе успее да обезбеди заеми за реализација на некои од овие проекти.

„Започнавме анализи и разговори за обезбедување кредит или други начини на финансирање. Се надевам дека во наредните 3-4 месеци ќе ги имаме прелиминарните резултати од овој обид. Доколку оваа операција заврши успешно, извесно е да се очекува дека барем дел од овие автопатишта ќе почнат да се градат в година. Засега од првичните разговори сме оптимисти, но сепак треба да се заврши овој процес за да видиме дали ќе успееме во нашата замисла“, потенцира Груевски. Тој пред неколку месеци најави дека заеми ќе се бараат само за автопатиштата кои се сметаат дека се од висок приоритет. Најнеинтересните делови од Коридорот 8 веројатно е дека нема воопшто да бидат изведени како автопатско решение, туку само ќе бидат проширени и реконструирани, бидејќи за нив е невозможно да се најде концесионер, ниту пак да се обезбедат финансии од меѓународните финансиски институции.

Довршувањето на Коридорот 8 во Македонија требаше да се реализира преку подигнување на ниво на автопат или целосна изградба на речиси 280 километри патишта. Во нив влегуваа патните правци Крива Паланка – Романовце, Кочани – Штип, Миладиновце – Штип, Миладиновце - Штип преку Свети Николе, како и патните правци Миладиновце – Скопје – Хиподром и обиколницата околу Скопје со должина од 38 километри. Дел од Коридорот 8 се и правците Стенковец – Блаце, Гостивар – Ќафасан, Требениште – Охрид, Струга –Подмоље, патната делница Гостивар – Букојчани – Кичево, Кичево – Требениште, Требениште – Охрид, Требениште – Струга, Струга – Ќафасан и Струга – Подмоље и веќе изградениот автопат Скопје – Тетово – Гостивар со должина од 54 километри.