Администрацијата посилна од кризата

Во регионот летаат откази, а кај нас се делат нови 118 работни места во државната администрација

Даниела Трпчевска



Додека земјите во регионот делат отказни решенија на вработените во државната администрација за да го ублажат ударот од светската криза, во македонската Агенција за државни службеници се изготвуваат нови решенија за вработување службеници според Рамковниот договор. Иако столчињата во државните јасли се одамна зафатени, а некаде на нив треба да седнат и двајца-тројца нововработени, Владата, сепак, не се откажува од идејата за примање нови кадри. Први на листата се 118 нови службеници од етничките заедници, за кои е распишан оглас.

Според експертите, никогаш нема да има премногу вработувања во државната администрација се' додека меѓукоалициските договори се во игра. Во такви услови, надлежните го занемаруваат фактот дека администрацијата е напумпана со масовна машинерија, која освен што е прекубројна, не нуди и стручност.

„Буџетот ќе се оптовари, тоа ќе биде дополнителен проблем за целата држава во услови на криза, но е очигледно дека Владата нема намера да запре со процесот на вработувања, бидејќи станува збор за меѓукоалициски договор кој мора да се исполни“, вели професорот Ванчо Узунов.

Хрватската влада, како дел од мерките за штедење, најави отпуштање на 20.000 вработени во државната управа и во јавниот сектор, а државните службеници и следната година ќе бидат без додатоци на плата, регрес и други вонредни примања загарантирани со досегашните колективни договори.

Во јавниот сектор во Хрватска се вработени 250.000 лица, а во овој момент 16.000 имаат право на полна пензија, но законот се' уште не им дозволува да заминат. Мерки за кастрење на вработените во државната администрација најавија и Србија и Словенија, додека грчката влада најави ограничување на платите на државните службеници до 1.900 евра, согласно со мерките за штедење за надминување на економската криза

Ваков обратен процес, според професорот Узунов, треба да се случи и во земјава. Место да се пумпа, треба да се намали администрацијата и на сметка на нејзината бројност да се оди повеќе на вработување стручни кадри. Спротивно на странските препораки, кадрите кои се вработуваат не исполнуваат ниту еден критериум, освен партискиот, укажуваат експертите, изразувајќи загриженост дека нов бран вработувања допрва би можел да следува во пресрет на локалните избори.

Одлуката за нови вработувања се реализира во услови кога македонската економија и официјално влезе во рецесија. Премиерот Никола Груевски на средбата со стопанствениците во неделата информираше дека во 2013 година нема да дозволи ниту масовни отпуштања од администрацијата заради заштеди во буџетот, ниту намалување на платите. Напротив, платите на административците се очекува да се зголемат.

Според процените, во земјава има 120 илјади вработени во државната администрација, за кои годишно од буџетот би требало да се издвојуваат околу една милијарда денари.

Професорот Зоран Ивановски смета дека со новите вработувања Владата се обидува да го амортизира социјалниот удар, како резултат на забавената економска активност и недостигот од нови инвестиции, што ќе отворат нови работни места.

„Избирајќи меѓу двете зла, се оди на решение кое на планот на вработувањата ќе даде резултати на краток рок. Но, ќе се преслика на буџетот и, притоа, може да предизвика буџетски дефицит“, вели Ивановски.

Од 2008 до 2011 година, според податоците кои неодамна ги презентираат од Демократската унија за интеграција, во државната администрација се вработиле речиси 9.000 Албанци. Истовремено се намалува и процентот на Македонците што работат за државата. Според нив, процентот на Албанци вработени во администрацијата изнесува околу 17 отсто, со што се оди кон исполнување дел од точките на Охридскиот рамковен договор, во делот на правичната застапеност.