Суспендиран деканот на Биотехничкиот факултет во Битола

Суспензијата доаѓа откако „Утрински“ пишуваше за обвинувањата за непотизам на битолскиот Универзитет

Анета Блажевска



Битола - Суспендиран е деканот на Биотехничкиот факултет во Битола, Љупче Кочовски. Тој вчера излезе пред новинарите, но не ја откри причината зошто е отстранет од функцијата. Веста ја потврдија и од Ректоратот на битолскиот Универзитет „Св. Климент Охридски“, но и тие решиле да молчат за мотивите, велат Сенатот ќе ја даде крајната одлука.

Битолската јавност веќе отворено се прашува дали суспензијата следува откако „Утрински весник“ објави текст во кој докторантот Невена Груевска од Битола обвинува дека Факултетот станал фамилијарна институција во кој царува непотизмот. „Најодговорно тврдам дека на Факултетот за биотехнички науки владее невиден непотизам, на кој вработувањето е неостварлив и далечен сон за обичен дипломиран инженер. Тоа е достапно само за одредени кругови луѓе, блиски до внатрешната структура на Факултетот и за членовите на нивните семејства“, рече Груевска за „Утрински весник“.

Суспендираниот декан Кочовски потврди дека бил отстранет од функцијата на 30 октомври со извесно образложение од ректорот на Универзитетот Златко Жоглев, за кое не сакаше да каже ништо попрецизно.

„Дека постојат основи за ваквата смена, постојат. Јас стојам зад тоа. Ова е дел од функционирањето на Универзитетот. Не би сакал да навлегувам подлабоко во причините, зашто, сепак, конечниот збор ќе го даде Сенатот“, рече Кочовски, одбивајќи да одговори дали неговата смена е поради обвинувањата за непотизам на Факултетот. Единствено кажа дека за време на неговото рако��одење со Факултетот вработил само две лица за кои тврди дека немаат семејни врски со него.

Портпаролот на Ректоратот, Елизабета Атанасоска, истакна дека на местото на Кочовски веќе е поставена професорката од БТФ Џулијана Томовска, а ректорот има право да суспендира декан поради кршење на законот и општи��е акти на Универзитетот.

„Сега имаме вршител на должност декан. Ректорот на Универзитетот проф д-р Златко Жоглев на седница на Сенат ќе образложи зошто е отстранет Кочовски. Сенатот се свикува во рок од 30 дена по суспензијата“, рече Атанасоска.

Неофицијално по пишувањата на „Утрински весник“ и откако Невена Груевска испрати писмо до премиерот, работењето на БТФ го чешлала инспекција. Па така ректорот, наводно вознемирен од случувањата, решил да ја расчисти работата. Но, Груевска во своето писмо точно со име и презиме наведува неколкумина професори кои практикувале непотизам на Факултетот и не го изолира овој случај. Таа обвинувањата ги докажуваше токму со најновиот завршен конкурс за асистенти на БТФ на кој како најдобар кандидат е избран м-р Владимир Китановски, инаку син на професор на истиот факултет д-р Димче Китановски. А, потоа следуваа имиња и на други членови на семејството на професорот згрижени на битолскиот универзитет. Груевска, која целокупниот свој образовен процес го има завршено на истиот овој факултет, каде што магистрирала во првата генерација магистри со успех од 9,75, вели дека во текот на изминатите десетина години постојано конкурира на објавените огласи за вработување помлади асистенти, но секогаш добива негативни одговори, без оглед на тоа што на сите конкурси нејзините карактеристики биле со највисоки вредности и целосно исполнети критериуми.