Искра Ветаџокоска, „Виталија“

Секоја генерација сака да остави свој печат

Покрај познатите синови што го презеле бизнисот од своите татковци, имаме и ќерки, дами, кои цврсто стојат на нозе и уште похрабро, можеби и со повеќе напор, се борат за свое место во овој машки бизнис-свет. Една од нив е косопственичката на „Виталија“, Искра Ветаџокоска. Таа, без разлика што ја имала олеснителната околност да продолжи да го шири веќе добро етаблираниот бизнис за здрава храна на своите родители, вели дека, сепак, секоја генерација сака да остави и свој печат.

„Ако тргнеме од претпоставката дека секој почеток е тежок, тогаш наследувањето веќе разработен бизнис и познат бренд би требало да претставува сериозна предност пред тие што почнуваат да дејствуваат на некое бизнис-поле. Меѓутоа, тоа е и сериозна одговорност за очекуван развој на бизнисот, посебно ако се земе предвид дека секоја генерација сака да остави свој печат и своја додадена вредност во идниот развој на компанијата. Тоа што за мене е од непроценлива вредност е искуството на мојот родител во градењето на компанијата, нешто што не може да се научи од книги и што претставува сериозна база за понатамошно надградување и развој на мојата личност и на компанијата“, истакнува во почетокот на разговорот Искра Ветаџокоска, менаџерка за маркетинг и продажба во „Виталија“.

Таа додава дека нема сомнеж оти дарбата за бизнис ја наследила од родителите, меѓутоа тоа само по себе не е доволно за успешно да се води бизнис. „За време на мојата 10-годишна академска кариера имав доволно можности да запознам повеќе теоретски елементи за водење бизнис. Но, чувствував дека постојано нешто ми недостасуваше. За тоа време семејниот бизнис растеше и во еден момент во мене се роди желбата наполно да му се посветам. Како инженер по вокација, за мене отсекогаш било предизвик да учествувам во развивање нови производи, од идеја до целосна реализација. ’Виталија‘ ми овозможи да си го остварам својот сон на најдобар можен начин. Но, со време открив и комплетно нови предизвици - како на тоа што е произведено да му се вметне додадена вредност и да се приближи до клиентите“, вели Ветаџокоска. Производното портфолио на „Виталија“ опфаќа над 200 сопствени производи што се произведени во Македонија, но во кои е вградено најсовременото светско знаење, трендови и технологија од областа ��а здравата храна. „Почнувајќи од производството според највисоки стандарди, па преку современата амбалажа, каналите за дистрибуција и продажба, се' е подредено на наполно задоволство на нашите клиенти, кои со голема доверба го пронајдоа во ’Виталија‘ својот партнер во креирањето на здрави генерации. А нам во ’Виталија‘ токму таа доверба на клиентите ни даде дополнителен мотив за освојување нови пазари. ’Виталија‘ денес е извозно ориентирана компанија и ги пласира своите производи на над 30 пазари во светот“, објаснува косопственичката на „Виталија“. „Моите заслуги секогаш ги сметам како заслуги на целокупниот тим на ’Виталија‘, затоа што кога се работи тимски, се ослободува огромна количина креативна енергија способна да помести и планина. Заедно со мојот тим, освоивме 15 нови пазари на сите континенти, воведовме над 50 нови производи... набројува Ветаџокоска.