Сашо Давитковски - „Скопски пазар“

Мојата обука беше спартанска

„Да се остане на патеката што ја оделе претходно успешните е навистина многу голем предизвик, а особено за децата чии татковци го правеле тоа“, вели Сашо Давитковски, прв човек на познатиот синџир маркети на „Скопски пазар“. Пресудно да влезе во раководниот тим на СП било претходно стекнатото практично работно искуство во фирмата каде што ја научил азбуката за водење на бизнисот. „Покрај практичната обука, се стекнав и со диплома на Економскиот факултет во Скопје, што особено ми го олесни процесот на приспособување во новата работна средина. Од особено голема помош ми беше мојот татко, со кого, пред се', изградивме професионален однос, а приватните разговори ги водевме во домашна атмосфера. Да се биде член на фамилијата ’Скопски пазар‘ е исклучително одговорна работа, без разлика на која позиција е членот и каква функција извршува. Нашиот директор го негуваше принципот на градење семејна фирма, не само за своето семејство, туку и за сите вработени во ’Скопски пазар‘. Во тој дух бевме воспитани и мојот постар брат и јас. Покрај практичната обука, која повеќе личеше на спартанска, го продолжив мојот образовен процес и за време на моето работење во ’Скопски пазар‘ се стекнав и со титула магистер на економски науки“, нагласува Давитковски. Тој вели дека многу научил од својот татко, меѓутоа и ден-денес има чувство дека не било доволно тоа.

„Процесот на учење, за да се биде добар и успешен стопанственик, не може да се собере во еден определен временски интервал. Но, можам да кажам дека мудроста која мојот татко, сега покоен, се трудеше и ми ја пренесе е најголемото богатство кое го носам со себе и ќе направам обид да го пренесам и на своите деца“, вели Давитковски. Што направил тој лично сам во ширењето на бизнисот? „На ова многу провокативно прашање секој што е и малку скромен и реален нема да може да ви го даде вистинскиот одговор. Меѓутоа, тоа што мене ме издвојува како раководител на друштвото, е што цврсто останав на линијата за зачувување на принципите за водење бизнис, која ја поставија минатите генерации. Како што вели една стара еврејска поговорка - не е лесно да се биде успешен, но најтешко е да се одржи успехот на минатите генерации“, вели Давитковски.