Хаг расправа за независноста на Косово

ХАГ - Тричасовното излагање на аргументите на Србија го започна шефот на српската делегација Душан Батаковиќ. Батаковиќ, кој е амбасадор на Србија во Париз, го образложи ставот на Србија дека декларацијата за независност на Косово ги нарушува темелите на меѓународниот правен поредок. На судиите требаше да им се обратат и заменик-шефот на делегацијата, Саша Обрадовиќ и експертите за меѓународно право Малколм Шо од Велика Британија, Марсел Коен од Швајцарија и Андреас Цимерман од Германија. На почетокот на расправата присуствуваше министерот за надворешни работи на Србија, Вук Јеремиќ.

Делегацијата на властите во Приштина кои во февруари 2008 година еднострано прогласија независност на Косово, своите аргументи пред судот требаше да ги изложат вчера попладне по 15 часот. Делегацијата на Приштина ја предводи министерот за надворешни работи Скендер Хисени, а правните аргументи во корист на независноста на Косово ќе ги претстави британскиот адвокат Мајкл Вуд.

„Дали едностраното прогласување независност од страна на привремените институции на самоуправување на Косово е во согласност со меѓународното право“, гласи прашањето кое во октомври 2008 година пред Меѓународниот суд на правдата го постави Генералното собрание на ОН, усвојувајќи Резолуција по барање на Србија во врска со тоа. Резолуцијата официјално беше примена во Палатата на мирот во Хаг на 10 октомври 2008 година.

Своите одговори на тоа прашање пред највисокиот суд на ОН ќе ги понудат претставниците на 28 држави од 1 до 11 декември. За учество во расправата се пријавија 30 земји, но, во меѓувреме се откажаа Бахраин и Лаос. Меѓународниот суд на правдата откако ќе ги сослуша устните аргументи, ќе утврди советодавно мислење кое не е обврзувачко за државите. За донесување советодавно мислење постојат рокови, а во практика донесувањето одлука на 15 судии, предводени од претседателот на судот Хисаши Овада од Јапонија, трае со месеци. На неодамнешна средба со новинарите, Овада истакна дека е нормално одлуката на судот да биде прифатена од Генералното собрание на ОН, кое и побара мислење. (Блиц)