На 26. роденден се удавил во Охридското Езеро

ОХРИД - Роденденската прослава за 26-годишно момче од Тетовско заврши кобно, откако завчера се удави кај Канео во водите на Охридското Езеро. Случаен минувач, завчера околу 15,30 часот го извлекол на брегот безживотното тело на Дарко Глигоровски од селото Радиовце. Момчето со чамец било донесено на градското пристаниште, а потоа и во охридската болница, но за животот на Дарко било доцна.

Глигоровски бил со своите другари на плажата Канео и сакајќи да се олади од сонцето, скокнал во студената езерска вода. Според докторите, наглата промена на температурата е причина за смртта на момчето.

Инаку, Глигоровски бил банкарски службеник, а во Охрид дошол да го прослави својот 26. роденден. (С.И.)