Го застрелал со ловечка пушка зашто и' додевал на сопругата

Љупчо Крстев од Орешје се бори за живот, во него пукал Добре Златкоски од Алинци

Моника Талеска

ПРИЛЕП - Добре Златкоски (35) од Алинци, Битолско, е осомничен за кривично дело убиство во обид, бидејќи завчера околу 21,30 часот, бранејќи ја честа на својата невенчана сопруга, во близина на сточниот пазар во Прилеп со ловечка пушка стрелал во Љупчо Крстев (36) од Орешје, Велешко, нанесувајќи му тешки телесни повреди. Крстев е итно пренесен на Хируршката клиника во Скопје и е во животна опасност.

Според информациите, Ружа Цветкоска (37) од Росоман, која во Прилеп живеела во вонбрачна заедница со Златкоски, му се пожалила на сопругот дека поранешниот познајник Крстев и' досадува по телефон. Таа, вечерта му закажала средба на пријателот на мостот кај сточниот пазар, но на средбата место неа отишол Златкоски. Вооружен со ловечка пушка, за која имал дозвола, тој испукал два патрона во Крстев, а потоа заминал ноќна смена на работа, бидејќи работел како фурнаџија.

Повредениот успеал некако да се довлече до портирницата од магацините на ГП „Прилепец“ и побарал помош од стражарот, кој случајот веднаш го пријавил во полиција.

„Пациентот е примен со повеќе прострелни рани во пределот на стомакот, градите и рацете. Откако е реанимиран на Одделението за интензивна нега, во свесна, но тешка здравствена состојба е испратен на хируршките клиники во Скопје“, информира д-р Сашо Димитриоски од Градската болница во Прилеп.

„Златкоски е приведен. Тој признал дека го извршил делото. Против него ќе биде поднесена кривична пријава“, соопшти Ѓоко Стрезовски, портпарол на СВР-Битола.

Златковски, веројатно, ќе заврши во притвор, а истрагата продолжува.