ВЕЛЕС - Проблемите во албанската паралелка се провлекуваат три години едноподруго. Најнапред немаше простор, па професори, а сега бојкотираат и родителите и професорите. Шеесет и тројца ученици од албанска националност кои учат во прва и во втора година во гимназијата „Кочо Рацин“ од Велес од вчера не одат на настава. Шестемина професори кои на учениците им предаваа на мајчин јазик ја бојкотираат наставата оти не добиле плата за лани.

„Минатата година работевме без пари. Не можеме и оваа година така да работиме. Само Министерството може да го реши проблемот“, вели Африм Зеќири, професор по албанска јазик.

Револтирани се и родителите. Се жалат оти и годинава децата ќе треба да учат на македонски и поради настанатите проблеми ќе мора да пропуштат дел од наставата.

„Ги праќаме децата, а професори нема. Немале пари за професорите. Срамно. Ако продолжи наставата на македонски, јас ќе го извадам детето оттука и нема да му дозволам да учи. На овој век да нема професори, да нема пари. А има пари да се градат разни споменици“, рече Имер Амзовски, родител.

Директорот на гимназијата, Гордан Стојчевски, вели дека ако Министерството и Општината најдат разбирање, тој веднаш ќе им исплати пари на професорите.

„Според Законот, постои еден начин на плаќање вишок на часови. Се плаќа по 100 денари хонорар од час. Тие се вработени во други училишта и доаѓаат од страна. Со овие пари не можат да ги покријат трошоците“, вели Стојчевски.

Градоначалникот Петров вели дека има волја да се реши проблемот, но треба да има разбирање од сите страни. „Општината може да им ги исплати парите веднаш. Но, тие бараат повеќе пари и законски не можеме да ги исплатиме“, објасни Петров. (С.Ќ.Н.)