Едриличарство

Македонија се повлече од Балканијадата поради името

Македонската едриличарска репрезентација ја напушти Балканијадата во Долни Милановац, Србија, поради омаловажување и инсистирање на домаќинот да се прифати ултиматумот на грчкиот тим Македонија да биде претставена со референцата ФИРОМ. Генералниот секретар на Македонската едриличарска федерација, Стефан Ставрев, вели дека непријатностите почнале пред три дена, кога на официјалната веб-страница на Балканијадата репрезентацијата на Македонија била претставена со кратенката ФИРОМ, иако во Интернационалната едриличарска федерација таа е примена под привременото име Поранешна Југословенска Република Македонија.

„На ова реагиравме и усно и писмено, но иако инсистиравме, до отворањето не добивме информација под кое име планираат да настапиме на Балканијадата. Пред самиот почеток од страна на претставници на организаторите ни беше кажано дека мораме да ги соблечеме дресовите на кои пишуваше „Macedonian sailing team“, што беше одбиено од наша страна“, објаснува Ставрев.

Откако репрезентацијата се построила зад таблата на која пишувало „The Former Yugoslav Republic of Macedonia“, организаторот ја прекинал церемонијата, а на репрезентацијата и' бил поставен ултиматум или да бидат соблечени националните дресови или да го напушти отворањето.

„Не го прифативме ултиматумот и се обидовме повторно да се построиме, во што бевме спречени, нашата табла беше тргната, македонското знаме не беше кренато и не се свиреше нашата национална химна“, вели Ставрев.

Македонските едриличари од клубовите АМАК СП „Бофор“ и „Стрмец“ од Охрид и „Снегар“ од Струга вчера требаше да се вратат во Македонија. За инцидентот на отворањето на Балканијадата е известена амбасадата на Република Македонија во Србија. (МИА)