Нови раскази од Васил Тоциновски на хрватски јазик

Во издание на Хрватското книжевно друштво од Риека излезе од печат книгата раскази на Васил Тоциновски „Сушачко поподне“. Во неа се поместени петнаесет раскази кои за прв пат се објавуваат во една целина. Темите и мотивите имаат универзални, општочовечки димензии, како и ликовите и карактерите, но просторот и времето инсистираат и ги носат кварнерските бои, мириси и вкусови. Низ најчесто тажните приказни за малиот, обичен човек авторот нурнува во потрага по значењата и вредностите на најбитните егзистенцијални категории: минливоста, бесмислата, апсурдот, парадоксот. Така човекот во превртеното време и во вриежот на светот се бори за сопствениот опстанок. Тој е неуморен трагач по вредностите од љубовта, почитта, довербата, разбирањето, притоа војувајќи против омразата, злобата и интригата. Не ретко неговата битка добива донкихотско значење наспрема ветерниците кои ги уништуваат елементарните вредности на светот, животот и човекот. Напишани едноставно и топло, исповедно, со убав и жив дијалог, низ многу реминисценции расказите на Тоциновски се читаат со интерес и возбуда. (Н.П.)