Изложба на Ладислав Цветковски во Њујорк

Денеска во галеријата Македонски центар во Њујорк, ќе биде отворена самостојната изложба на ликовниот уметник Ладислав Цветковски „Pixstories 2“, која претставува надоврзување на неговата изложба во Музејот на Град Скопје, реализирана во 2009 година.

Во оваа пригода тој ќе презентира дигитални графики создадени со помош на компјутер и печатени на платно и на хартија, а покрај тоа, за прв пат ќе го прикаже и своето десетминутно видео, „Circle walk“, во кое е содржана авторовата желба преку динамизирање на статичната слика што ја надополнува со човечка сенка, симболички да опише еден „живот на одење“. Во видеото е користена музика компонирана и изведена од Доријан Јовановиќ, од неговиот проект „Axiotomic“, од нумерата „Noise Drops“.

Ладислав Цветковски повеќе од две децении работи како ликовен уметник и дизајнер. Во моментот раководи со Катедрата по графика на Факултетот за ликовни уметности во Скопје, каде што предава дигитална технологија и графички дизајн. (К.Б.)