Промоција на ликовна книга од Благојче Наумоски

Вечерва во „Мала станица“ во 20 часот ќе биде промовирана ликовната книга „Скици за осврт во неколку концепти“ на авторот Благојче Наумоски-Бане. Книгата претставува индивидуална визија и избор на создавање, ослободена од уредничка, издавачка и маркетиншка политика, а пред се', од цензура и рецензија. Благојче Наумоски преку овој медиум со своето современо уметничко размислување создава експресија на својата креативност, претставувајќи мноштво процеси и експерименти на психичките состојби при создавањето на уметничкото дело.

Неговите истражувања манифестираат дематеријализација на уметничкиот објект, дематеријализација на класичната процесуалност на уметничкото дело и заложба за алтернативна платформа на делување, добивајќи ферментирана експериментално-концептуална форма. Тие истражувања, во дадениов случај создаваат алтернативен документарен простор, ја деконструираат литералната и типографска форма на книгата, во целост ја менуваат примарната нејзина функција, која преминува во хибридна форма на интермедиум, еден вид интеракција помеѓу психичкиот уметнички објект и психичката состојба на умот при процесот на творење. (К.Р.)