Врие од медицински грешки, а се кријат

Во Македонија официјално има од 80 до 120 медицински грешки

Јасмина Јовановска

Медицинските грешки што завршуваат фатално за животот на пациентите, се кријат по болниците и по клиниките во земјава. Официјално, во текот на годината се пријавуваат од 80 до 120 медицински грешки, но стручњаците предупредуваат дека бројката е нереална. Според нив, во земјава има далеку повеќе медицински киксови, но тие не се евидентираат. Лекарите сметаат дека причина за тоа е недоволно развиениот систем на пријавување на медицинските грешки. Ова се само дел од забелешките што беа изнесени на 17. Симпозиум на лекарските комори од Централна и од Источна Европа, на кои лекарските еснафи дискутираа за безбедноста на пациентите и за квалитетот на медицината.

Дискутантите укажаа дека и покрај тоа што постои Закон за права на пациентите, кој е донесен во 2008 година, тој во практиката тешко се реализира и за него малку се знае. Најчесто за медицинските грешки болните се жалат на несоодветно место, на пример, во медиумите, а некогаш случаите ги пријавуваат во Министерството за здравство, односно во Здравствено- санитарната инспекција, а помалку пријави има до Лекарската комора.

„Причината за медицинските грешки се од човечката несовршеност до многу недостатоци во здравствениот систем“, ук��жа д-р Владимир Борозанов, претседател на Лекарска комора на Македонија.

Лекот, според него, е во изработување на национална стратегија за подобрување на квалитетот на здравствената услуга, со што ќе се подобри и безбедноста на пациентите. Но, во услови на ограничени ресурси за финансирање, тоа може тешко да се реализира, поради што е потребна помош и од Светската здравствена организација и од Европската заедница. Затоа, додаде д-р Борозанов, ако веќе имаме европска легислатива, треба да се насочиме кон едукација како на пациентите, така и на лекарите и на јавноста за безбедноста на болните, но да има и контрола врз квалитетот на медицинските информации.

Медицинските грешки не и се случуваат само на Македонија. Во светот годишно се регистрираат по седум милиони медицински грешки, при што како последица умираат околу еден милион пациенти.

„Кај нас нема статистика колку има болнички инфекции или колку медицински грешки се случуваат во операционите сали. Додека не се евидентира проблемот, тој не може да се искорени“, забележа д-р Јован Тофоски, претседател на Македонското лекарско друштво.

За намалување на медицинските грешки мора да се воспостават системи на јасни протоколи при секоја операција или интеревнеција, кои ќе бидат видно истакнати, како, на пример, кои чекори треба да се направат пред да се стави анестезија на пациентот.

„Со ваквиот модел се покажало дека медицинските грешки може да се намалат од 32 до 50 отсто“, потенцира д-р Тофоски. Според него, Лекарската комора треба да се насочи кон ваквите јасни протоколи зашто тие не чинат многу. „На нивно пополнување се губи само три минути, а бенефитот од нив е огромен“, додаде Тофоски.

За разлика од нашата земја каде што се' се врти околу медицинскиот тим, во другите земји се става акцент на негата на болниот. Колку повеќе се обезбедат средства за нега на болниот, толку шансите за медицински грешки се помали.