Одбраната ги оспорува балистичките вештачења

Со констатација дека еден од четворицата осудени за убиството на полицискиот специјалец Зоран Марковски е починат, Судски совет на скопска Апелација вчера ја започна јавната седница закажана по приемот на првостепената пресуда. Судскиот совет ги информираше присутните дека од Министерството за правда примил допис со кој се потврдува дека второбвинетиот Харун Алију починал на 10 мај оваа година, а потоа беше донесено решение со кое се запира постапката за него.

За убиството се осудени на доживотен затвор Харун Алију викан Кушо (39), Исмаил Аќеми се прекар Тиха (27) и Башким Бајрами (31). Беким Дарлишта (32) за непријавување подготвување на кривично дело беше осуден на три години затвор.

Во жалбите на осудените се оспоруваа дел од доказите што беа изведени на претходното судење. За одбраната не беа спорни само балистичките вештачења, за кои беше речено дека делумно навлегуваат во ингеренциите на работата на експертите за судско-медицински вештачења, туку и записниците што се воделе. Според одбраната, постои отсуство на материјални докази, а пресудата е нејасна.

Полицискиот „тигар“ Зоран Марковски беше убиен во јануари 2008 година, при напад на полицискиот џип во кој се наоѓале и четворица негови колеги. Јавното обвинителство го оквалификува нападот како одмазда за полициската акција „Планинска бура“, која беше реализирана во тетовското село Бродец. (Љ.С.)