Фрчкоски: Ќе се борат неколку кандидати и една партија
Претседателскиот кандидат на СДСМ и НСДП, Љубомир Фрчкоски, вчера имаше средба со евроамбасадорот Ерван Фуере, кого го запознал со своите гледања на ситуацијата во Македонија и програмата за претседателските избори. „Од амбасадорот ги слушнав нивните идеи околу точките за кои се загрижени, а кои посебно ќе ги следат во текот на изборниот процес, и големата концентрација на меѓународниот интерес на овие избори заради важноста за политичките текови кои Македонија може да ги земе потоа“, рече кандидатот на двете опозициски партии.
Замолен да ги коментира обвинувањата што доаѓаат од претседателскиот кандидат Ѓорге Иванов, Фрчкоски рече: „Не коментирам кандидати кои во принцип немаат сила да се соочат и да кажат нешто конкретно за тоа како мислат да ја водат земјата, туку седат во пазувите на своите партиски шефови. Македонските граѓани не заслужуваат такво криење. На овие избори ќе се борат неколку кандидати и една партија, а тоа е ВМРО-ДПМНЕ, која мисли да му го избори мандатот на својот кандидат“.
Според Фрчкоски, централна тема нема да биде името, туку сиромаштијата и внатрешното пропаѓање на Македонија. Таа не може да се избегне, бидејќи ние се уриваме стравотно брзо и по нашите улици перманентно има групи што протестираат, бидејќи Македонија е под индексот на апсолутна сиромаштија зад Албанија, состојба која никогаш не се случила во историјата на државата.
Значи, тоа ќе биде главната тема поврзана со можностите претседателот да отвори опции на нормална меѓуна��одна комуникација на земјата, на враќање на нејзиниот драматично нарушен меѓународен углед и за брзо интегрирање во НАТО и во ЕУ. (Б.Ј.) |
